കൂടുതല്‍ പേരും പൊണ്ണത്തടിയുള്ളവര്‍; പൊതുയിടങ്ങളില്‍ പൗരന്മാരുടെ ഭാരം അളക്കുന്ന പദ്ധതിയുമായി തുര്‍ക്കി

ഡെയ്ലി മെയിലാണ് ഇക്കാര്യം റിപ്പോര്‍ട്ട് ചെയ്തത്.

വര്‍ദ്ധിച്ചുവരുന്ന പൊണ്ണത്തടി നിരക്ക് നിയന്ത്രിക്കുന്നതിനായി, പൊതു ഇടങ്ങളില്‍ പൗരന്മാരുടെ ഭാരം തൂക്കിനോക്കുന്നതും അമിതഭാരമുള്ളവരോട് ശരീരഭാരം കുറയ്ക്കാന്‍ പ്രേരിപ്പിക്കുന്നതും ഉള്‍പ്പെടുന്ന ഒരു രാജ്യവ്യാപക ആരോഗ്യ സംരംഭം തുര്‍ക്കി ആരംഭിച്ചു.  ഡെയ്ലി മെയിലാണ് ഇക്കാര്യം റിപ്പോര്‍ട്ട് ചെയ്തത്. 

മെയ് 10 ന് ആരംഭിച്ച ഈ കാമ്പെയ്ന്‍, ജൂലൈ 10 ഓടെ 10 ദശലക്ഷം ആളുകളുടെ ഭാരം അളന്ന് ബോഡി മാസ് ഇന്‍ഡക്‌സ് വിലയിരുത്താനാണ് പദ്ധതി. ഏകദേശം എട്ട് പൗരന്മാരില്‍ ഒരാളുടെ ബോഡി മാസ് ഇന്‍ഡക്‌സ് (BMI) ആണ് വിലയിരുത്തുക. 81 പ്രവിശ്യകളിലും തൂക്ക സ്‌കെയിലുകളും ടേപ്പ് അളവുകളും ഉള്ള ആരോഗ്യ പ്രവര്‍ത്തകരെ തുര്‍ക്കി വിന്യസിച്ചിട്ടുണ്ട്. ടൗണ്‍ സ്‌ക്വയറുകളിലും മാളുകളിലും ബസ് സ്റ്റേഷനുകളിലും ഫുട്‌ബോള്‍ സ്റ്റേഡിയങ്ങള്‍ക്ക് പുറത്തും BMI പരിശോധനകള്‍ നടത്തുന്നു.

അടുത്തിടെ നടന്ന ഒരു നഴ്സിംഗ് കോണ്‍ഫറന്‍സില്‍ തുര്‍ക്കിയിലെ ആരോഗ്യ മന്ത്രി കെമാല്‍ മെമിസോഗ്ലു പറഞ്ഞത് തുര്‍ക്കിയിലെ അമ്പത് ശതമാനം പേരും അമിതഭാരമുള്ളവരാണെന്നാണ്. 'അമിതഭാരം എന്നാല്‍ രോഗികളായിരിക്കുക എന്നാണ്. അതിനര്‍ത്ഥം ഭാവിയില്‍ നമുക്ക് അസുഖം വരുമെന്നാണ്. നമ്മുടെ കൊച്ചുകുട്ടികള്‍ക്ക് അമിതഭാരമുണ്ട്, അവരുടെ ശരീര പ്രതിരോധം കൂടുതലാണ്, അതുകൊണ്ടാണ് അവര്‍ക്ക് അസുഖം വരാത്തത്, പക്ഷേ അവര്‍ പ്രായമാകുമ്പോള്‍, ആ ഭാരം സന്ധി-ഹൃദ്രോഗങ്ങളായി മാറും.'-അദ്ദേഹം പറഞ്ഞു.