UAE Weather: യുഎഇയില്‍ ശക്തമായ മഴയില്‍ പ്രളയ സമാന സാഹചര്യം. ഒമാനില്‍ മരണസംഖ്യ 18 ആയി. കാണാതായ ആളുകള്‍ക്കായി തെരച്ചില്‍ തുടരുന്നു. തിങ്കളാഴ്ച രാത്രിയോടെ തുടങ്ങിയ മഴ ഇന്നലെ വൈകിട്ടും തുടര്‍ന്നു. ദുബായില്‍ കഴിഞ്ഞ 24 മണിക്കൂറിനിടെ 142 മില്ലി മീറ്റര്‍ മഴ ലഭിച്ചെന്നാണ് കണക്കുകള്‍. ദുബായ് ഇന്റര്‍നാഷണല്‍ എയര്‍പോര്‍ട്ടില്‍ വെള്ളം കയറി. കൊച്ചിയില്‍ നിന്നു യുഎഇയിലേക്കുള്ള മൂന്ന് വിമാനങ്ങള്‍ ഇതിനോടകം റദ്ദാക്കിയിട്ടുണ്ട്.
ദുബായിലെ വെള്ളം കയറിയ നഗരങ്ങളില്‍ പൊലീസും അടിയന്തര വിഭാഗവും രക്ഷാപ്രവര്‍ത്തനം തുടരുകയാണ്. ചൊവ്വാഴ്ച രാത്രി ദുബായില്‍ ശക്തമായ ഇടിമിന്നലും അനുഭവപ്പെട്ടു. മെട്രോ ഗതാഗതം താറുമാറായി. ഓണ്‍പാസീവ് മെട്രോ സ്റ്റേഷന്‍, മാള്‍ ഓഫ് എമിറേറ്റ്‌സ് എന്നിവിടങ്ങളില്‍ വെള്ളം കയറിയ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിക്കുന്നുണ്ട്. യുഎഇയില്‍ സ്‌കൂളുകള്‍ അടച്ചു. ടാങ്കര്‍ ട്രക്കുകളുടെ സഹായത്തോടെയാണ് വീടുകളിലെ കയറിയ വെള്ളം പുറത്തേക്ക് ഒഴുക്കുന്നത്. ബഹ്‌റിന്‍, ഖത്തര്‍, സൗദി അറേബ്യ എന്നിവിടങ്ങളിലും ശക്തമായ മഴ ലഭിച്ചു.