യുക്രൈന്റെ അമേരിക്കന്‍ നിര്‍മ്മിത യുദ്ധവിമാനമായ എഫ്-16 റഷ്യന്‍ ആക്രമണത്തില്‍ തകര്‍ന്നുവീണു; പൈലറ്റ് കൊല്ലപ്പെട്ടു

ശനിയാഴ്ച ഉക്രൈനില്‍ റഷ്യ വലിയ ആക്രമണം നടത്തിയിരുന്നു.

യുക്രൈന്റെ അമേരിക്കന്‍ നിര്‍മ്മിത യുദ്ധവിമാനമായ എഫ് 16 റഷ്യന്‍ ആക്രമണത്തില്‍ തകര്‍ന്നുവീണു. പൈലറ്റ് കൊല്ലപ്പെട്ടു. എഫ്-16 യുദ്ധവിമാനം തകര്‍ന്ന കാര്യം യുക്രൈന്‍ സ്ഥിരീകരിച്ചിട്ടുണ്ട്. റഷ്യ-യുക്രൈന്‍ യുദ്ധത്തില്‍ മൂന്നാം തവണയാണ് എഫ് -6 വിമാനം തകരുന്നത്. ശനിയാഴ്ച ഉക്രൈനില്‍ റഷ്യ വലിയ ആക്രമണം നടത്തിയിരുന്നു. 477 ഡ്രോണുകളും 60 മിസൈലുമാണ് ആക്രമണം നടത്തിയത്. 

ഡ്രോണുകളില്‍ ഭൂരിഭാഗവും യുക്രെയിന്‍ പ്രതിരോധ സംവിധാനങ്ങള്‍ തകര്‍ത്തെങ്കിലും മിസൈലുകള്‍ ലക്ഷ്യം കാണുകയായിരുന്നു. അതേസമയം ഇസ്രയേല്‍ വീണ്ടും ആക്രമണത്തിന് പദ്ധതിയിടുന്നതായി ഇറാന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇസ്രയേല്‍ ആയുധങ്ങള്‍ വന്‍തോതില്‍ സംഭരിക്കുന്നുവെന്ന് ഫാര്‍സ് ന്യൂസ് ഏജന്‍സി റിപ്പോര്‍ട്ട് ചെയ്യുന്നു. അമേരിക്കയില്‍ നിന്നും പാശ്ചാത്യ രാഷ്ട്രങ്ങളില്‍ നിന്നും വന്‍തോതില്‍ ആയുധങ്ങള്‍ ഇസ്രയേലില്‍ വിമാനങ്ങളില്‍ എത്തിയതായി റിപ്പോര്‍ട്ടില്‍ പറയുന്നു.

അതേസമയം തങ്ങളുടെ രാജ്യത്ത് നടന്ന ആക്രമണങ്ങളുടെ ഉത്തരവാദിത്വം അമേരിക്കയും ഇസ്രയേലും ഏറ്റെടുക്കണമെന്ന് ഇറാന്‍ ആവശ്യപ്പെട്ടു. നഷ്ടപരിഹാരം നല്‍കണമെന്നും ക്രിമിനല്‍ കുറ്റങ്ങള്‍ക്ക് നടപടി വേണമെന്നും ഇറാന്‍ വിദേശകാര്യ മന്ത്രി അബ്ബാസ് അരഗ്ചി പറഞ്ഞു. യുഎന്‍ സെക്രട്ടറി ജനറലിന് അയച്ച കത്തിലാണ് ഇക്കാര്യം ആവശ്യപ്പെട്ടത്.