സമ്മതമില്ലാതെ വിവാഹം നടത്തി, ഭർത്താവിനെ കൊല്ലാൻ പ്ലാനിട്ട് യുവതി; പക്ഷേ മരിച്ചത് ബന്ധുക്കൾ

ഭർത്താവിനായി ഒരുക്കിയ കെണിയിൽ വീണത് ബന്ധുക്കൾ; മരണം 13

പാലിൽ വിഷം ചേർത്ത് ഭർത്താവിനെ കൊല്ലാൻ ശ്രമിച്ച നവവധു കുടുങ്ങി. യുവതിയുടെ കെണിയിൽ ബന്ധുക്കളായ 13 പേർ മരിച്ചു. ഭർത്താവിനെ ഒഴിവാക്കുന്നതിനായിട്ടാണ് യുവതി പാലിൽ വിഷം ചേർത്തത്. പാകിസ്ഥാനിലെ ലാഹോറിലാണ് സംഭവം. 

ലാഹോറിന് സമീപം ദൗലത് പൗർ സ്വദേശി ആസിയയാണ് ഭർത്താവ് അംജത്തിനെ കൊല്ലാൻ പാലിൽ വിഷം ചേർത്തത്. എന്നാൽ അംജത്ത് പാലുകുടിക്കാത്തതിനാൽ ആ പാലുകൂടി ചേർത്തു തയ്യാറാക്കിയ ലെസ്സി കുടിച്ചാണ് ബന്ധുക്കൾ മരിച്ചത്. 14 പേർ ആശുപത്രിയിലുമാണ്.

ആസിയയുടെ സമ്മതമില്ലാതെയാണ് ഇവരുടെ വിവാഹം നടത്തിയത്. ഇതിലുള്ള എതിർപ്പ് പിന്നീട് കലഹത്തിലേക്ക് എത്തുകയായിരുന്നു. വിവാഹശേഷം നടത്തിയ സൽക്കാരത്തിനിടെയാണ് ആസിയ അംജത്തിനായുള്ള പാലിൽ വിഷം കലർത്തിയത്.സ്ത്രീ മറ്റൊരുളുമായി പ്രണയത്തിലായിരുന്നെന്നും പോലീസ് പറയുന്നു.