ബോളിവുഡ് താരങ്ങളുടെയും ക്രിക്കറ്റ് താരങ്ങളുടെ പ്രണയവും സൌഹൃദങ്ങളും എന്നും വാര്‍ത്തകളില്‍ നിറഞ്ഞു നില്‍ക്കുന്നതാണ്. ഐപിഎല്‍ മത്സരങ്ങളില്‍ താരങ്ങളുടെ കാമുകിമാര്‍ എത്തുന്നത് പതിവ് കാഴ്‌ചയാണ്.
ഇത്തവണ മാധ്യമങ്ങളില്‍ നിറഞ്ഞു നില്‍ക്കുന്ന ബന്ധമാണ് ഡല്‍ഹി ഡെയര്‍ ഡെവിള്‍സ് നായകന്‍ സഹീര്‍ഖാന്റെയും 'ചക് ദേ ഇന്ത്യ' സിനിമയിലെ നായിക സാഗരിക ഘാട്ട്‌ഗേയുടേതും.
ഐപിഎല്ലില്‍ ഡല്‍ഹി ടീമിന്റെ ജേഴ്‌സിയില്‍ സഹീറിന്റെ ടീമിന് പിന്തുണയുമായി ആരാധകര്‍ക്കൊപ്പം സാഗരികയുമുണ്ട്. ഇടവേളകളില്‍ മൂന്‍ ഇന്ത്യന്‍ പേസര്‍ക്ക് അടുത്തെത്തി വിവരങ്ങള്‍ ചോദിച്ചറിയുന്നതിനും സാഗരിക സമയം കണ്ടെത്തുന്നുണ്ട്.
കഴിഞ്ഞ ദിവസം പൂനെയുമായുള്ള മത്സരത്തിനിടെ ഡല്‍ഹിയുടെ ജേഴ്‌സിയില്‍ സാഗരിക എത്തിയിരുന്നു. സാഗരിക സഹീറുമൊത്ത് സംസാരിക്കുന്ന നിമിഷങ്ങള്‍ ക്യാമറക്കണ്ണുകള്‍ ഒപ്പിയെടുത്തിരുന്നു. ഇത് സാമൂഹ്യമാധ്യമങ്ങളില്‍ വൈറലായിരുന്നു.
അതേസമയം, ബന്ധത്തെക്കുറിച്ച് തുറന്നു പറയാന്‍ ഇരുവരും തയാറായിട്ടില്ല. യുവരാജ് സിംഗിന്റെയും ഹസല്‍കീച്ചിന്റെയും വിവാഹത്തില്‍ സഹീറും സാഗരികയും എത്തിയിരുന്നു. ഇതോടെയാണ് ഇരുവരും തമ്മില്‍ പ്രണയത്തിലാണെന്ന വാര്‍ത്തകളും പ്രചരിക്കാന്‍ തുടങ്ങിയത്.
ഐപിഎല്ലില്‍ ഡല്‍ഹി രണ്ട് കളികള്‍ ജയിക്കുകയും രണ്ടെണത്തില്‍ പരാജയപ്പെടുകയും ചെയ്‌തു.