അഹമ്മദബാദിലെ നരേന്ദ്ര മോദി സ്റ്റേഡിയത്തില്‍ നടന്ന മുംബൈ ഇന്ത്യന്‍സ് - ഗുജറാത്ത് ടൈറ്റന്‍സ് മത്സരത്തിനിടെ നാടകീയ രംഗങ്ങള്‍. മുംബൈയുടെ പുതിയ നായകന്‍ ഹാര്‍ദിക് പാണ്ഡ്യയെ ആരാധകര്‍ അധിക്ഷേപിച്ചു. ടോസ് ചെയ്യാന്‍ ഗ്രൗണ്ടിലേക്ക് എത്തിയ സമയം മുതല്‍ ഹാര്‍ദിക്കിനെ ആരാധകര്‍ കൂവിവിളിക്കുകയായിരുന്നു. രോഹിത് ശര്‍മയെ നായകസ്ഥാനത്തു നീക്കിയതാണ് മുംബൈ ആരാധകരെ പ്രകോപിപ്പിച്ചിരിക്കുന്നത്.
ടോസിങ്ങിനായി ഹാര്‍ദിക് ഗ്രൗണ്ടിലേക്ക് ഇറങ്ങിയപ്പോള്‍ മുംബൈ ആരാധകര്‍ വലിയ സ്വരത്തില്‍ 'രോഹിത് രോഹിത്' എന്ന് വിളിച്ചുപറയുകയായിരുന്നു. ചിലര്‍ 'ഗോ ബാക്ക് ഹാര്‍ദിക്' എന്നും പറഞ്ഞു. മത്സരത്തിനിടെ ഗ്രൗണ്ടിലേക്ക് ഒരു തെരുവ് നായ ഇറങ്ങിയപ്പോള്‍ കാണികളില്‍ പലരും 'ഹാര്‍ദിക് ഹാര്‍ദിക്' എന്ന് പരിഹാസ രൂപേണ ഓളിയിട്ടു. ഇതിന്റെ വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്.