ടീമുകൾ അടിമുടി മാറും, ഐപിഎൽ മെഗാതാരലേലം റിയാദിൽ?, ഈ മാസം അവസാനമെന്ന് റിപ്പോർട്ട്

ഇന്ത്യന്‍ പ്രീമിയര്‍ ലീഗ് 2025 സീസണ്‍ മെഗാ താരലേലം ഈ മാസം അവസാനം സൗദി അറേബ്യയിലെ റിയാദില്‍ വെച്ച് നടക്കുമെന്ന് റിപ്പോര്‍ട്ടുകള്‍. നിലവില്‍ താരലേലത്തിന് മുന്നോടിയായി ടീമുകള്‍ നിലനിര്‍ത്തുന്ന താരങ്ങളുടെ ലിസ്റ്റ് പുറത്തുവിട്ടിട്ടുണ്ട്. പല സൂപ്പര്‍ താരങ്ങളെയും ലേലത്തിന് മുന്‍പായി ടീമുകള്‍ കൈവിട്ടിട്ടുണ്ട്. അതിനാല്‍ തന്നെ പല ഫ്രാഞ്ചൈസികളുടെയും ടീം കോമ്പിനേഷന്‍ തന്നെ വരാനിരിക്കുന്ന ഐപിഎല്ലില്‍ മാറാന്‍ സാധ്യതയേറെയാണ്.

2025 സീസണിനായുള്ള ഐപിഎല്‍ താരലേലം നവംബര്‍ 24,25 തീയ്യതികളിലായി റിയാദില്‍ നടക്കുമെന്നാണ് ബിസിസിഐ വൃത്തങ്ങളെ ഉദ്ധരിച്ചുള്ള റിപ്പോര്‍ട്ടുകള്‍ പറയുന്നത്. കൊല്‍ക്കത്ത നായകനായിരുന്ന ശ്രേയസ് അയ്യര്‍, ഡല്‍ഹി ക്യാപ്പിറ്റല്‍സ് നായകന്‍ റിഷഭ് പന്ത്, എല്‍എസ്ജിയില്‍ നിന്നും കെ എല്‍ രാഹുല്‍ തുടങ്ങി നിരവധി താരങ്ങളെ ടീമുകള്‍ റിലീസ് ചെയ്തിരുന്നു. ഇതോടെ ഇവരെ പല ടീമുകളും നായകസ്ഥാനം ലക്ഷ്യമിട്ട് നിലനിര്‍ത്താന്‍ ഇടയുണ്ട്. ഇവര്‍ക്ക് പുറമെ ജോസ് ബട്ട്ലര്‍, ട്രെന്‍ഡ് ബോള്‍ട്ട് തുടങ്ങി നിരവധി വിദേശതാരങ്ങളും ലേലത്തിലുണ്ടാകും. ഇതോടെ ഐപിഎല്‍ 2025ല്‍ പുതിയ ടീം കോമ്പിനേഷനുകളാകും പല ടീമുകള്‍ക്കും ഉണ്ടാവുക.