ഐപിഎല്ലില്‍ ഏറെക്കാലമായി വയസന്‍ പടയെന്ന് വിളിപ്പേരുള്ള സംഘമാണ് ചെന്നൈ സൂപ്പര്‍ കിംഗ്‌സ്. മറ്റ് ടീമുകളെല്ലാവരും തന്നെ യുവതാരങ്ങള്‍ക്ക് പിന്നാലെ പോകുമ്പോള്‍ പയറ്റി തെളിഞ്ഞ താരങ്ങളെ ടീമിലെത്തിച്ച് ഐപിഎല്ലില്‍ മാസ് കാണിക്കുന്നത് ചെന്നൈയ്ക്ക് ഇന്നുമൊരു തമാശയാണ്. ഇപ്പോഴിതാ പരിക്ക് മൂലം സീസണ്‍ നഷ്ടപ്പെട്ട ഡെവോണ്‍ കോണ്‍വെയ്ക്കും സീസണില്‍ ഇനിയുള്ള മത്സരങ്ങളില്‍ നിന്നും മാറിനില്‍ക്കുന്ന മുസ്തഫിസുര്‍ റഹ്മാനും പകരക്കാരനായി 36ക്കാരനായ ഇംഗ്ലീഷ് പേസറെ ടീമിലെത്തിച്ചിരിക്കുകയാണ് ചെന്നൈ.
നിലവില്‍ ആദ്യ നാല് സ്ഥാനത്തിലുള്ള ചെന്നൈ പ്ലേ ഓഫ് ലക്ഷ്യമിട്ടാണ് കളിക്കുന്നത്. ഡെവോണ്‍ കോണ്‍വെയ്ക്ക് പകരക്കാരനായാണ് എത്തുന്നതെങ്കിലും മുസ്തഫിസുറിന്റെ വിടവാകും പുതുതായി എത്തുന്ന ഇംഗ്ലീഷ് പേസര്‍ റിച്ചാര്‍ഡ് ഗ്ലീസണ്‍ നികത്തുക. ഇന്ത്യക്കെതിരെ ടി20യിലെ അരങ്ങേറ്റ മത്സരത്തില്‍ രോഹിത് ശര്‍മ, വിരാട് കോലി,റിഷഭ് പന്ത് എന്നിവരെ പുറത്താക്കി അന്താരാഷ്ട്ര ക്രിക്കറ്റില്‍ വരവറിയിച്ച താരമാണ് ഗ്ലീസന്‍. 34 ഫസ്റ്റ് ക്ലാസ് മത്സരങ്ങളില്‍ നിന്നും 143 വിക്കറ്റുകളും 82 ടി20 മത്സരങ്ങളില്‍ നിന്നും 91 വിക്കറ്റുകളും താരത്തിനുണ്ട്. ന്യൂബോളില്‍ അപകടകാരിയാണ് താരം.