ഇന്ത്യക്കെതിരായ ഏകദിന,ടി20 പരമ്പരയ്‌ക്കുള്ള ടീമിനെ പ്രഖ്യാപിച്ച് ക്രിക്കറ്റ് ഓസ്ട്രേലിയ. ആരോൺ ഫിഞ്ച് നായകനായുള്ള 18 അംഗ ടീമിനെയാണ് പ്രഖ്യാപിച്ചിരിക്കുന്നത്. അതേസമയം ഓസ്ട്രേലിയയുടെ ഭാവി പ്രതീക്ഷയായി വാഴ്‌ത്തപ്പെടുന്ന യുവ ഓൾറൗണ്ടർ കാമറൂൺ ഗ്രീൻ ആദ്യമായി ടീമിൽ സ്ഥാനം നേടി. സ്റ്റീവ് സ്‌മിത്ത്, ഡേവിഡ് വാര്‍ണര്‍, മിച്ചല്‍ സ്റ്റാര്‍ക്ക്, മാര്‍നസ് ലബുഷെയ്‌ന്‍, ഗ്ലെന്‍ മാക്‌സ്‌വെൽ അടക്കമുള്ള സൂപ്പർ താരങ്ങളും ടീമിൽ ഉണ്ട്.
നിലവിൽ റിക്കി പോണ്ടിങ്ങിന് ശേഷം ഓസീസ് കണ്ട ഏറ്റവും മികച്ച യുവ ബാറ്റ്സ്മാനെന്ന് വിശേഷിക്കപ്പെടുന്ന കാമറൂൺ ഗ്രീനിന് ടീമിലിടം നേടാനായതാണ് ഇത്തവണത്തെ സവിശേഷത. ഫസ്റ്റ് ക്ലാസ് ക്രിക്കറ്റില്‍ 21 ശരാശരിയിലാണ് താരം പന്തെറിയുന്നത്. 17-ാം വയസിലെ അരങ്ങേറ്റത്തില്‍ അഞ്ച് വിക്കറ്റ് നേട്ടവും ഗ്രീനിന്റെ പേരിലുണ്ട്. ഇന്ത്യയുടെ ഓസ്‌ട്രേലിയന്‍ പര്യടനത്തിനുള്ള ടീമിനെ ബിസിസിഐ കഴിഞ്ഞ ദിവസം പ്രഖ്യാപിച്ചിരുന്നു. മൂന്ന് വീതം ഏകദിനങ്ങങ്ങളും ടി20യും നാല് ടെസ്റ്റുമാണ് സീരീസിലുള്ളത്. ഇതിൽ ഒരെണ്ണം പകൽ-രാത്രി ടെസ്റ്റാണ്.
