അടുത്ത ജന്മത്തിൽ അധ:കൃതനായി ജനിക്കണം, ദളിതനു വേണ്ടി പോരാടണം: സുരേഷ് ഗോപിക്ക് പ്രത്യക്ഷ മറുപടിയുമായി പി.സി.ജോർജ്

അടുത്ത ജന്മത്തിൽ അധ:കൃതനായി ജനിക്കണം, ദളിതനു വേണ്ടി പോരാടണം: പി.സി.ജോർജ്

നടനും എം പിയുമായ സുരേഷ് ഗോപിക്ക് പ്രത്യക്ഷ മറുപടിയുമായി പി.സി.ജോർജ് എം.എൽ.എ രംഗത്ത്. തനിക്ക് ഇനി ഒരു ജന്മമുണ്ടാകുകയാണെങ്കില്‍ അധ:കൃതനായി ജനിക്കണമെന്നാണ് ആഗ്രഹമെന്നാണ് പി.സി പറയുന്നത്. അങ്ങനെയാണ് താന്‍ ജനിക്കുന്നതെങ്കില്‍, ഒരു സംശയവും വേണ്ട, ദളിത് വിഭാഗക്കാരെയും പാവങ്ങളെയും ദ്രോഹിക്കുന്നവരുടെ ചെവിക്കല്ല് അടിച്ചു പൊട്ടിക്കുന്നത് എങ്ങനെയെന്ന കാര്യം ആളുകളെ  പഠിപ്പിക്കുമെന്നും അദ്ദേഹം കൂട്ടിച്ചേര്‍ത്തു. 

പുനര്‍ജന്മത്തില്‍ വിശ്വസിക്കുന്ന ആളാണ് തന്നെന്നും അടുത്ത ജന്മത്തില്‍ തനിക്ക് പൂണൂലിടുന്ന ബ്രാഹ്മണനായി ജനിക്കണമെന്നാണ് ആഗ്രഹമെന്നും കഴിഞ്ഞദിവസം സുരേഷ് ഗോപി പറഞ്ഞിരുന്നു. ബ്രാഹ്മണനായി ശബരിമലയിലെ തന്ത്രിമുഖ്യനാകണമെന്നും താന്‍ ആഗ്രഹിക്കുന്നതായും തിരുവനന്തപുരത്ത് യോഗക്ഷേമ സഭയുടെ സംസ്ഥാന സമ്മേളനത്തില്‍ സുരേഷ് ഗോപി പറഞ്ഞിരുന്നു. ഇതിനാണ് പ്രത്യക്ഷ മറുപടിയുമായി പിസി രംഗത്തെത്തിയത്.