ആലുവയില്‍ വീട്ടമ്മയെ ഭര്‍തൃസഹോദരന്‍ വെട്ടിക്കൊന്നു
വീട്ടമ്മയെ ഭര്‍ത്താവിന്‍റെ സഹോദരന്‍ വെട്ടിക്കൊന്നു.
വീട്ടമ്മയെ ഭര്‍ത്താവിന്‍റെ സഹോദരന്‍ വെട്ടിക്കൊന്നു. കരുമാല്ലൂര്‍ പ്രാഥമികാരോഗ്യ കേന്ദ്രത്തിനു സമീപം പുതപ്പാടം വീട്ടില്‍ രവിയുടെ ഭാര്യ രാധിക (റുഖിയ - 45) യാണു വധിക്കപ്പെട്ടത്. ഇതോടനുബന്ധിച്ച് രവിയുടെ ഇളയ സഹോദരന്‍ മധു എന്ന 38 കാരനെ പൊലീസ് അറസ്റ്റ് ചെയ്തു.
കഴിഞ്ഞ ദിവസം ഉച്ചയ്ക്ക് രണ്ട് മണിയോടെയാണ് സംഭവം. അവിവാഹിതനായ മധു ലഹരി പദാര്‍ത്ഥങ്ങള്‍ക്ക് അടിമയാണെന്നും വഴിയില്‍ അലഞ്ഞു തിരിഞ്ഞ ഇയാളെ ഉച്ചയ്ക്ക് രവി ഭക്ഷണം നല്‍കാനായി വീട്ടിലെത്തിക്കുകയായിരുന്നു എന്നും പൊലീസ് അറിയിച്ചു. എന്നാല്‍ ഭക്ഷണം കഴിക്കുന്നതിനിടെ മധു പ്രത്യേക കാരണമൊന്നും കൂടാതെ അടുക്കളയില്‍ കയറി വാക്കത്തിയെടുത്ത് രാധികയുടെ കഴുത്തില്‍ വെട്ടുകയായിരുന്നു. ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
വീട്ടില്‍ തന്നെയുണ്ടായിരുന്ന പ്രതിയെ ആലുവ പൊലീസ് അറസ്റ്റ് ചെയ്തു. മുന്‍ ഗ്രാമപഞ്ചായത്ത് അംഗവും സി പി എം ലോക്കല്‍ കമ്മിറ്റി അംഗവുമാണു രവി.
