സ്ത്രീകളെ ശല്യം ചെയ്തത് ചോദ്യം ചെയ്തയാള്‍ക്ക് ട്രെയിനില്‍ വെച്ച് കുത്തേറ്റു

കോച്ചിനുള്ളില്‍ ശല്യം ചെയ്തപ്പോള്‍ മാറിനില്‍ക്കാന്‍ പല തവണ ഇയാളോട് സ്ത്രീകള്‍ ആവശ്യപ്പെട്ടു

ആലപ്പുഴ - കണ്ണൂര്‍ എക്‌സിക്യൂട്ടീവ് എക്‌സ്പ്രസില്‍ യാത്രക്കാരന് കുത്തേറ്റു. സ്ത്രീകളെ ശല്യം ചെയ്തത് ചോദ്യം ചെയ്ത ആളെ സഹയാത്രികന്‍ സ്‌ക്രൂ ഡൈവര്‍ ഉപയോഗിച്ച് കുത്തുകയായിരുന്നു. പരുക്ക് ഗുരുതരമല്ലാത്തതിനാല്‍ യാത്രക്കാരന്‍ ഇടേ ട്രെയിനില്‍ തന്നെ കണ്ണൂരിലേക്ക് യാത്ര തുടര്‍ന്നു. 

വെള്ളിയാഴ്ച രാത്രി 11.30 ഓടെ പയ്യോളിക്കും വടകരയ്ക്കും ഇടയിലാണ് സംഭവം നടന്നത്. ട്രെയിന്‍ വടകരയില്‍ എത്തിയപ്പോള്‍ ആര്‍പിഎഫ് പ്രതിയെ കസ്റ്റഡിയിലെടുത്തു. ഇയാള്‍ മദ്യലഹരിലായിരുന്നു എന്നാണ് യാത്രക്കാര്‍ പറയുന്നത്.

കോച്ചിനുള്ളില്‍ ശല്യം ചെയ്തപ്പോള്‍ മാറിനില്‍ക്കാന്‍ പല തവണ ഇയാളോട് സ്ത്രീകള്‍ ആവശ്യപ്പെട്ടു. അനുസരിക്കാതെ വന്നപ്പോഴാണ് യാത്രക്കാരന്‍ ഇടപെട്ടത്. തുടര്‍ന്ന് സ്‌ക്രൂ ഡൈവര്‍ ഉപയോഗിച്ച് ഇയാള്‍ യാത്രക്കാരനെ ആക്രമിക്കുകയായിരുന്നു.