പത്തനംതിട്ടയില്‍ ഹോം നഴ്സിന്റെ മര്‍ദ്ദനമേറ്റ അല്‍ഷിമേഴ്സ് രോഗി മരിച്ചു

ഇതിന്റെ ദൃശ്യങ്ങള്‍ സോഷ്യല്‍ മീഡിയയില്‍ വ്യാപകമായി പ്രചരിച്ചിരുന്നു.

പത്തനംതിട്ട: ഹോം നഴ്സിന്റെ ക്രൂരമായ മര്‍ദ്ദനത്തെ തുടര്‍ന്ന് ചികിത്സയിലായിരുന്ന 59 കാരനായ അല്‍ഷിമേഴ്സ് രോഗി ഞായറാഴ്ച മരിച്ചു. പത്തനംതിട്ടയിലെ തട്ട സ്വദേശിയായ ശശിധരന്‍ പിള്ളയാണ് മരിച്ചത്. ഒരു മാസം മുമ്പ് രോഗിയെ ഹോം നഴ്സ് വിഷ്ണു ക്രൂരമായി മര്‍ദ്ദിച്ചിരുന്നു. ഇതിന്റെ ദൃശ്യങ്ങള്‍ സോഷ്യല്‍ മീഡിയയില്‍ വ്യാപകമായി പ്രചരിച്ചിരുന്നു. പിള്ളയെ വീടിന്റെ തറയില്‍ വലിച്ചിഴയ്ക്കുന്ന ദൃശ്യങ്ങളില്‍ മുഖത്തും തലയിലും പുറകിലും ഗുരുതരമായി പരിക്കേറ്റിരുന്നു.

ഏപ്രില്‍ 25 നാണ് സംഭവം നടന്നത്. സംഭവത്തിന് ശേഷം വിവിധ ആശുപത്രികളില്‍ ചികിത്സയിലായിരുന്നു പിള്ള. പന്തളത്തെ ഒരു സ്വകാര്യ ആശുപത്രിയില്‍ ചികിത്സയിലിരിക്കെയാണ് അദ്ദേഹം മരിച്ചത്. ആക്രമണ വാര്‍ത്ത പുറത്തുവന്നയുടന്‍ കൊടുമണ്‍ പോലീസ് വിഷ്ണുവിനെ അറസ്റ്റ് ചെയ്തിരുന്നു. പ്രതി ഇപ്പോള്‍ റിമാന്‍ഡിലാണ്. വിഷ്ണുവിനെതിരെ ഇന്ന് ഉച്ചയോടെ മറ്റൊരു പരാതി നല്‍കുമെന്ന് പിള്ളയുടെ കുടുംബം മാധ്യമങ്ങളോട് പറഞ്ഞു. പിള്ള മുന്‍ ബിഎസ്എഫ് ജവാനാണ്. അടൂരിലെ ഒരു ഏജന്‍സി വഴിയാണ്  ഹോം നഴ്സിനെ നിയമിച്ചത്. അദ്ദേഹത്തിന്റെ ബന്ധുക്കള്‍ തിരുവനന്തപുരത്തെ പാറശാലയിലാണ്.