മലപ്പുറം കോട്ടക്കലില്‍ എ ടി എം തകര്‍ത്ത് മോഷണ ശ്രമം

മലപ്പുറത്തെ കോട്ടക്കലിൽ എ ടി എം മെഷീൻ തകർത്ത് കവർച്ച നടത്താൻ ശ്രമം.

മലപ്പുറത്തെ കോട്ടക്കലിൽ എ ടി എം മെഷീൻ തകർത്ത് കവർച്ച നടത്താൻ ശ്രമം. കോട്ടക്കൽ ഒതുക്കുങ്ങലിലെ പി കെ ടവറിൽ സ്ഥാപിച്ചിട്ടുള്ള സൗത്ത് ഇന്ത്യൻ ബാങ്കിന്‍റെ എ ടി എം മെഷീനാണ് തകര്‍ത്തത്. എട്ട് ലക്ഷത്തിലധികം രൂപയാണ് മെഷീനിൽ ഉണ്ടായിരുന്നത്. എന്നാല്‍ പണം നഷ്ടപ്പെട്ടിട്ടില്ലെന്ന് ബാങ്ക് അധികൃതര്‍ വ്യക്തമാക്കി.  

ഇന്ന് പുലർച്ചെ 4.30തോടെയാണ് സംഭവം നടന്നത്. എ ടി എമ്മിനുള്ളിൽ സ്ഥാപിച്ചിരുന്ന രണ്ട് നിരീക്ഷണ ക്യാമറകളും മോഷ്ടാവ് തകർത്തു. എന്നിരുന്നാലും മോഷ്ടാവിന്റെ മുഖവും മെഷീൻ തകർക്കുന്ന ദൃശ്യങ്ങളും ക്യാമറയിൽ വ്യക്തമായി പതിഞ്ഞിട്ടുണ്ട്. മോഷ്ടാവ് മലയാളിയാണെന്നാണ്‍ സംശയമെന്ന് പൊലീസ് അറിയിച്ചു. കോട്ടക്കൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.