PV Anvar: 'വായില്‍ തോന്നിയത് കോതയ്ക്കു പാട്ട്'; അന്‍വറിനെ അടുപ്പിക്കരുതെന്ന് കോണ്‍ഗ്രസ് പ്രവര്‍ത്തകര്‍

PV Anvar: പ്രതിപക്ഷ നേതാവ് വി.ഡി.സതീശനെതിരെ അന്‍വര്‍ നടത്തിയ പരാമര്‍ശങ്ങള്‍ ചൂണ്ടിക്കാട്ടിയാണ് കോണ്‍ഗ്രസ് അനുയായികളുടെ വിമര്‍ശനം

PV Anvar: പി.വി.അന്‍വറിനെ യുഡിഎഫിലേക്കു അടുപ്പിക്കരുതെന്ന് കോണ്‍ഗ്രസ് പ്രവര്‍ത്തകര്‍. നിലമ്പൂര്‍ ഉപതിരഞ്ഞെടുപ്പ് ഫലം പുറത്തുവന്നതിനു പിന്നാലെ അന്‍വറിനെ മുന്നണിയില്‍ എത്തിക്കാന്‍ കെപിസിസി നേതൃത്വം ശ്രമങ്ങള്‍ ആരംഭിച്ചിട്ടുണ്ട്. ഈ സാഹചര്യത്തിലാണ് സോഷ്യല്‍ മീഡിയയിലൂടെ കോണ്‍ഗ്രസ് അനുഭാവികള്‍ എതിര്‍പ്പ് പരസ്യമാക്കിയത്. 

പ്രതിപക്ഷ നേതാവ് വി.ഡി.സതീശനെതിരെ അന്‍വര്‍ നടത്തിയ പരാമര്‍ശങ്ങള്‍ ചൂണ്ടിക്കാട്ടിയാണ് കോണ്‍ഗ്രസ് അനുയായികളുടെ വിമര്‍ശനം. 'വായില്‍ തോന്നിയത് കോതയ്ക്കു പാട്ട്' എന്ന രീതിയാണ് അന്‍വറിന്റേത്. കെട്ടുറപ്പോടെ മുന്നോട്ടുപോകുന്ന മുന്നണിയിലേക്ക് അന്‍വര്‍ എത്തിയാല്‍ കാര്യങ്ങള്‍ അവതാളത്തിലാകും. തോന്നുമ്പോഴൊക്കെ രാഷ്ട്രീയ നിലപാട് മാറ്റുന്ന അന്‍വര്‍ മുന്നണിയില്‍ തലവേദന സൃഷ്ടിക്കുമെന്നും കോണ്‍ഗ്രസ് അനുഭാവികള്‍ പറയുന്നു. 

' സ്വന്തം നിലനില്‍പ്പ് മാത്രമാണ് അന്‍വറിന്റെ ലക്ഷ്യം. പിണറായിസത്തിനെതിരായ പോരാട്ടമെന്നു പറഞ്ഞ് എല്‍ഡിഎഫ് വിട്ടുവന്ന അന്‍വര്‍ പ്രതിപക്ഷ നേതാവ് വി.ഡി.സതീശനെതിരെ നടത്തിയ പരാമര്‍ശങ്ങള്‍ അത്യന്തം നീചമാണ്. അങ്ങനെയൊരു അവസരവാദിയെ മുന്നണിയില്‍ എടുക്കുന്നത് യുഡിഎഫിനു ദോഷം ചെയ്യും.' എന്നാണ് ഒരു കോണ്‍ഗ്രസ് അനുഭാവി ഫെയ്‌സ്ബുക്കില്‍ പ്രതികരിച്ചിരിക്കുന്നത്. നിലമ്പൂരില്‍ അന്‍വര്‍ ഇല്ലാതെയും ജയിക്കാമെന്ന് യുഡിഎഫ് തെളിയിച്ചു. ഇനിയും അന്‍വറിനു വഴങ്ങി കൊടുത്താല്‍ അത് മുന്നണിക്ക് തിരിച്ചടിയാകുമെന്നാണ് മറ്റൊരാളുടെ അഭിപ്രായം. അന്‍വറിനെ മുന്നണിയിലെടുത്താല്‍ സജീവ കോണ്‍ഗ്രസ് പ്രവര്‍ത്തനം നിര്‍ത്തുമെന്ന് പറഞ്ഞവരും ഉണ്ട്. 

അതേസമയം യുഡിഎഫ് പ്രവേശനം ആഗ്രഹിക്കുന്ന അന്‍വര്‍ സതീശനെതിരായ നിലപാട് മയപ്പെടുത്തി. പിണറായി വിജയനെതിരായ പോരാട്ടത്തില്‍ യുഡിഎഫിനൊപ്പം ചേര്‍ന്നു പ്രവര്‍ത്തിക്കാമെന്ന നിലപാടിലാണ് ഇപ്പോള്‍ അന്‍വര്‍. തദ്ദേശ തിരഞ്ഞെടുപ്പ് ആകുമ്പോഴേക്കും യുഡിഎഫ് പ്രവേശനം ഉറപ്പിക്കാനാണ് അന്‍വറിന്റെ ശ്രമം. താന്‍ ഇല്ലാതെയും നിലമ്പൂരില്‍ യുഡിഎഫ് വിജയിച്ച സാഹചര്യത്തിലാണ് അന്‍വറിന്റെ വഴങ്ങിക്കൊടുക്കല്‍. 

2026 ലെ നിയമസഭാ തിരഞ്ഞെടുപ്പില്‍ ബേപ്പൂര്‍ സീറ്റ് തനിക്കു വേണമെന്നാണ് അന്‍വറിന്റെ ഉപാധി. പൊതുമരാമത്ത് മന്ത്രിയായ പി.എ.മുഹമ്മദ് റിയാസിനെതിരെ ബേപ്പൂരില്‍ മത്സരിക്കാന്‍ ആഗ്രഹമുണ്ടെന്ന് അന്‍വര്‍ പറഞ്ഞു. 'യുഡിഎഫില്‍ മാന്യമായ സ്ഥാനം ലഭിക്കുകയാണെങ്കില്‍ മരുമോനിസത്തിന്റെ വേര് അറുക്കാന്‍, എനിക്ക് ആയുസുണ്ടെങ്കില്‍ ട്ടോ..ഈ 2026 മേയില്‍ നടക്കുന്ന തിരഞ്ഞെടുപ്പില്‍ ബേപ്പൂരില്‍ ഞാന്‍ മത്സരിക്കും. ബേപ്പൂരില്‍ പി.വി.അന്‍വര്‍ മത്സരിക്കും. പിണറായിസത്തിന്റെ മരുമോനിസത്തിന്റെ വേര് ഞാന്‍ അറുക്കും ജനങ്ങളെ കൂട്ടി,' അന്‍വര്‍ പറഞ്ഞു.