P.V.Anvar: നിലമ്പൂര്‍ ഉപതിരഞ്ഞെടുപ്പില്‍ വന്‍ മുന്നേറ്റമുണ്ടാക്കി പി.വി.അന്‍വര്‍. സ്വതന്ത്ര സ്ഥാനാര്‍ഥിയായി മത്സരിച്ച അന്‍വര്‍ 15,000 ത്തില്‍ അധികം വോട്ടുകള്‍ പിടിച്ചു. 12 റൗണ്ടുകള്‍ പൂര്‍ത്തിയായപ്പോള്‍ അന്‍വറിന്റെ വോട്ട് 15,810 ആയി.
താന്‍ പിടിച്ചത് യുഡിഎഫ് വോട്ടുകളാണെന്ന് മാധ്യമങ്ങള്‍ പറയുന്നുണ്ട്. എന്നാല്‍ അത് അടിസ്ഥാനരഹിതമാണ്. താന്‍ പിടിച്ചത് പിണറായിസത്തിനെതിരായ വോട്ടുകളാണെന്ന് അന്‍വര്‍ പറഞ്ഞു.
'പിണറായിസത്തിനെതിരായ വോട്ടുകളാണ് ഞാന്‍ പിടിച്ചത്. എല്‍ഡിഎഫ് ക്യാംപില്‍ നിന്നാണ് വോട്ടുകള്‍ വന്നിരിക്കുന്നത്. സകല മന്ത്രിമാരും എംഎല്‍എമാരും എംപിമാരും വന്ന് പ്രചരണം നടത്തി. പക്ഷേ കാര്യമുണ്ടായില്ല. ഇതില്‍ നിന്ന് ചില പാഠങ്ങള്‍ പഠിക്കണം. കാസര്‍ഗോഡ് മുതല്‍ കന്യാകുമാരി വരെ പിണറായിസത്തിനെതിരായ വികാരം നിലനില്‍ക്കുകയാണ്. മലയോര മേഖലകളിലെ പ്രശ്‌നങ്ങള്‍, വന്യജീവി ആക്രമണം എന്നിവ അഡ്രസ് ചെയ്യാതെ 2026 ല്‍ നിയമസഭ ഭരണം പിടിക്കാമെന്ന് ആരും കരുതേണ്ട,' അന്‍വര്‍ പ്രതികരിച്ചു.
