മൂന്ന് മാസമായി റേഷൻ വിഹിതം വാങ്ങിയില്ല. 59,688 കുടുംബങ്ങളുടെ റേഷൻ വിഹിതം റദ്ദാക്കി

മൂന്ന് മാസമായി തുടര്‍ച്ചയായി റേഷന്‍ വിഹിതം വാങ്ങാത്തതിനെ തുടര്‍ന്ന് സംസ്ഥാനത്ത് 59,688 കുടുംബങ്ങളുടെ സൗജന്യ റേഷന്‍ വിഹിതം റദ്ദാക്കി. മുന്‍ഗണന വിഭാഗത്തില്‍ റേഷന്‍ വിഹിതം വാങ്ങിയിരുന്നവരെ നോണ്‍ പ്രയോരിറ്റി നോണ്‍ സബ്‌സിഡി വിഭാഗത്തിലേക്ക് തരം താഴ്ത്തുകയാണ് ചെയ്തത്. ഇനി മുന്‍ഗണന ലഭിക്കണമെങ്കില്‍ പുതിയ അപേക്ഷ നല്‍കേണ്ടതായി വരും.

കേന്ദ്ര,സംസ്ഥാന സര്‍ക്കാരുകളുടെ ആനുകൂല്യത്തോടെയുള്ള റേഷന്‍ വിഹിതം കൈപ്പറ്റുന്ന അന്ത്യോദയ അന്നയോജന പ്രയോറിറ്റി ഹൗസ് ഹോള്‍ഡ്, നോണ്‍ പ്രയോരിറ്റി സബ്‌സിഡി എന്നീ വിഭാഗങ്ങളില്‍ ഉള്‍പ്പെടുന്ന റേഷന്‍ കാര്‍ഡ് ഉടമകളുടെ ആനുകൂല്യങ്ങളാണ് മൂന്ന് മാസമായി തുടര്‍ച്ചയായി റേഷന്‍ വിഹിതം വാങ്ങാതിരുന്നതിനെ തുടര്‍ന്ന് ഇല്ലാതായത്.

പ്രയോരിറ്റി ഹൗസ് ഹോള്‍ഡ് വിഭാഗത്തില്‍ 48,724 പേരുടെ ആനുകൂല്യവും അന്ത്യോദയ അന്നയോജന വിഭാഗത്തില്‍ 6,672 നോണ്‍ പ്രയോറിറ്റി സബ്‌സിഡിയിലുള്ള 4,292 റേഷന്‍ കാര്‍ഡുകളാണ് നോണ്‍ പ്രയോറിറ്റി നോണ്‍ സബ്‌സിഡി വിഭാഗത്തിലേക്ക് തരംതാഴ്ത്തിയത്. എറണാകുളം ജില്ലയില്‍ മാത്രം 8,571 പേര്‍ക്കാണ് ആനുകൂല്യം നഷ്ടമായത്. ഏത് റേഷന്‍ കടയില്‍ വേണമെങ്കിലും റേഷന്‍ വാങ്ങാമായിരുന്നിട്ടും വാങ്ങാത്തത് ശ്രദ്ധയില്‍ പെട്ടതിനെ തുടര്‍ന്നാണ് നടപടി.