പ്രളയക്കെടുതി; സര്‍ക്കാരിനെതിരെ കോടതിയെ സമീപിക്കുമെന്ന് ബിജെപി

പ്രളയക്കെടുതിയില്‍ അകപ്പെട്ടവരെ രക്ഷിക്കാനുള്ള തീവ്രശ്രമവുമായി സംസ്ഥാന സര്‍ക്കാര്‍ നീങ്ങവെ പ്രതിഷേധ സ്വരവുമായി ബിജെപി രംഗത്ത്.  

രക്ഷാപ്രവർത്തനം പട്ടാളത്തിന് കൈമാറിയില്ലെങ്കില്‍ കോടതിയെ സമീപിക്കുമെന്ന് ബിജെപി സംസ്ഥാന അധ്യക്ഷന്‍ പിഎസ് ശ്രീധരൻപിള്ള വ്യക്തമാക്കി.

രക്ഷാപ്രവര്‍ത്തനം പട്ടാളത്തിന് കൈമാറേണ്ടതില്ലെന്ന സര്‍ക്കാരിന്റെ പിടിവാശി ഗുരുതര വീഴ്‌ചയാണ്. സമാന സാഹചര്യമുണ്ടായ മറ്റു സംസ്ഥാനങ്ങളെല്ലാം ഈ മാര്‍ഗം സ്വീകരിച്ചതാണ്. അതിനാല്‍ ഇക്കാര്യത്തില്‍ സര്‍ക്കാര്‍ കടുംപിടുത്തം തുടര്‍ന്നാല്‍ കോടതിയെ സമീപിക്കുമെന്നും ശ്രീധരൻപിള്ള പറഞ്ഞു.

പട്ടാളത്തിന്റെ നേതൃത്വത്തിൽ സംസ്ഥാനത്തെ വിവിധ വകുപ്പുകളുടെ ഏകോപനമാണ് ദുരന്തങ്ങളുണ്ടായ മറ്റ് സംസ്ഥാനങ്ങളില്‍ വിജയകരമായത്. എന്നാല്‍ കേരളത്തില്‍ പട്ടാളത്തിന്റെ സേവനം പ്രയോജനപ്പെടുത്തുന്നതിൽ പരാജയമാണെന്ന് ചെങ്ങന്നൂരിലെയും മറ്റും അനുഭവങ്ങൾ തെളിക്കുന്നതായും ബിജെപി സംസ്ഥാന അദ്ധ്യക്ഷൻ കൂട്ടിച്ചേർത്തു.