തൃശൂർ: പത്ത് വയസുള്ള ബാലികയെ വീട്ടിൽ അതിക്രമിച്ചു കയറി ലൈംഗികമായി പീഡിപ്പിക്കാൻ ശ്രമിച്ചപ്പോൾ അതിനു സാധിക്കാതെ വരികയും തുടർന്ന് കുട്ടിയെ കൊലപ്പെടുത്താൻ ശ്രമിക്കുകയും ചെയ്ത കേസിലെ പ്രതിക്ക് കോടതി 15 വർഷം കഠിന തടവ് ശിക്ഷ വിധിച്ചു. വലപ്പാട് ചാമക്കാല സ്വദേശി പോണത്ത് വീട്ടിൽ ചെപ്പു എന്നറിയപ്പെടുന്ന നിഖിൽ (31) നാണു ഒന്നാം ക്ലാസ് ജില്ലാ ജഡ്ജി പി.എൻ.വിനോദ് ശിക്ഷ വിധിച്ചത്.
വിവിധ വകുപ്പുകളിലായി 15 വർഷവും ഒമ്പതു മാസവും കഠിന തടവും ഒരു ലക്ഷം രൂപ പിഴയും ആണ് കോടതി വിധിച്ചത്. കേബിൾ വരിസംഖ്യ പിരിക്കാൻ എന്ന പേരിൽ എത്തിയ പ്രതി നാലാം ക്ലാസ് വിദ്യാർത്ഥിനി വീട്ടിൽ ഒറ്റയ്ക്കാണെന്നു കണ്ട് പീഡിപ്പിക്കാൻ ശ്രമിക്കുകയായിരുന്നു. എന്നാൽ കുട്ടി എതിർത്തപ്പോൾ തോർത്തുപയോഗിച്ചു കഴുത്തിൽ മുറുക്കി ശ്വാസം മുട്ടിക്കുകയും വയറ്റിൽ കത്തി കൊണ്ട് കുത്തി കൊലപ്പെടുത്താൻ ശ്രമിക്കുകയുമായിരുന്നു.
അബോധാവസ്ഥയിൽ രക്തം വാർന്നു കിടന്ന കുട്ടിയെ അയൽവീട്ടിലെ കൂട്ടുകാരാണ് കണ്ടത്. തുടർന്ന് കുട്ടിയെ ആശുപത്രിയിൽ എത്തിക്കുകയായിരുന്നു. വലപ്പാട് പൊലീസാണ് കേസ് രജിസ്റ്റർ ചെയ്തത്.
