അവധി ചോദിച്ച അധ്യാപികയെ അസഭ്യം പറ‍ഞ്ഞെന്ന പരാതിയില്‍ പ്രധാനാധ്യാപകൻ അറസ്റ്റിൽ. ഒറ്റപ്പാലം എസ്ഡിവിഎംഎ എൽപിഎസ് സ്കൂളിലെ ഹെഡ്മാസ്റ്റർ ഉദുമാൻ കുട്ടി ആണ് അറസ്റ്റിലായത്. അധ്യാപികയുടെ പരാതിയെ തുടർന്നാണ് പ്രധാനാധ്യാപകനെ ഒറ്റപ്പാലം പൊലീസ് അറസ്റ്റ് ചെയ്തത്. ഉച്ചയ്ക്കുശേഷം അവധി വേണമെന്ന് ആവശ്യപ്പെട്ടപ്പോഴാണ് പ്രധാനാധ്യാപകന്‍ അസഭ്യം വർഷം നടത്തിയത്.
തുടർന്നു കുഴഞ്ഞുവീണ അധ്യാപികയെ ഒറ്റപ്പാലം താലൂക്കാശുപത്രിയിൽ പ്രവേശിപ്പിച്ചിരുന്നു. പിന്നീട് അസഭ്യം വിളിച്ച വോയ്സ് ക്ലിപ്പ് ഉൾപ്പെടെ പരാതി നൽകുകയായിരുന്നു. വോയ്സ് ക്ലിപ്പ് സാമൂഹികമാധ്യമങ്ങളിലും പ്രചരിച്ചിട്ടുണ്ട്. സ്ത്രീത്വത്തെ അപമാനിക്കുക ഉൾപ്പെടെയുള്ള വകുപ്പുകൾ ചുമത്തിയാണ് പൊലീസ് അറസ്റ്റ് ചെയ്തിരിക്കുന്നത്.