കൊച്ചി: പ്രതിപക്ഷ നേതാവ് രമേശ് ചെന്നിത്തല നയിക്കുന്ന ഐശ്വര്യ കേരളം യാത്രയുടെ ഭാഗമായി കൊച്ചിയില്‍ എത്തിയപ്പോള്‍ രമേശ് ചെന്നിത്തലയെ ഷാള്‍ അണിയിക്കുകയും കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനൊപ്പം നിന്ന് ഫോട്ടോയെടുക്കുകയും ചെയ്ത ആറു പൊലീസുകാരെ സസ്പെന്ഡ് ചെയ്തു.
ചട്ടലംഘനം നടത്തി എന്ന റിപ്പോര്‍ട്ടിന്റെ അടിസ്ഥാനത്തില്‍ ആദ്യം എറണാകുളം റൂറലിലെ ഉദ്യോഗസ്ഥരായ ബിജു, സില്‍ജന്‍ എന്നിവരെയാണ് അന്വേഷണ വിധേയമായി സസ്പെന്ഡ് ചെയ്തത്. കൊച്ചി സിറ്റി പോലീസ് സ്പെഷ്യല്‍ ബ്രാഞ്ച് നല്‍കിയ റിപ്പോര്‍ട്ട് പ്രകാരമാണ് സസ്പെന്‍ഷന്‍.
സിറ്റി ജില്ലാ ആസ്ഥാനത്തെ എ.എസ്.ഐ ജോസ് ആന്റണി, സിറ്റി കണ്‍ട്രോള്‍ റൂം എ.എസ്.ഐ ഷിബു ചെറിയാന്‍, കല്ലൂര്‍ക്കാട് എ.എസ്.ഐ ബിജു, എറണാകുളം റൂറല്‍ ഹെഡ് ക്വര്‍ട്ടേഴ്സ് ക്യാംപിലെ സി.പി.ഓ സില്‍ജന്‍, സിറ്റി ഹെഡ് ക്വര്‍ട്ടേഴ്സ് ക്യാംപിലെ സി.പി.ഓ ദിലീപ് സദാനന്ദന്‍ എന്നിവര്‍ ക്കെതിരെയാണ് റിപ്പോര്‍ട്ട് നല്‍കിയിരിക്കുന്നത്. ഇവരെ ആറു പേരെയും ഇപ്പോള്‍ സസ്പെന്ഡ് ചെയ്തു.
ചെന്നിത്തലയുമൊത്തുള്ള ഫോട്ടോകള്‍ വന്നതിനെ തുടര്‍ന്ന് കൊച്ചി സിറ്റി പോലീസ് കമ്മീഷണര്‍ സി.എച്ച്.നാഗരാജുവാണ് അന്വേഷണത്തിന് ഉത്തരവിട്ടത്. പോലീസുകാരുടെ വാട്ട്‌സ് ആപ്പ് ഗ്രൂപ്പില്‍ പോസ്റ്റ് ചെയ്ത ഫോട്ടോയാണ് പോലീസുകാര്‍ക്ക് വിനയായത് എന്നാണു സൂചന. അതെ സമയം ഈ പോലീസ് ഉദ്യോഗസ്ഥരെല്ലാം തന്നെ പോലീസ് അസോസിയേഷന്‍ മുന്‍ ഭാരവാഹികളാണ്.