നിയുക്ത മന്ത്രി കെ ബി ഗണേഷ് കുമാറിന് സിനിമ വകുപ്പ് കൂടി നല്‍കണമെന്ന ആവശ്യവുമായി കേരളാ കോണ്‍ഗ്രസ് ബി. നവകേരള സദസ്സിന് പിന്നാലെയാണ് രണ്ടാം പിണറായി മന്ത്രിസഭ അഴിച്ചുപണിക്ക് ഒരുങ്ങുന്നത്. കെബി ഗണേഷ് കുമാറും കടന്നപ്പള്ളി രാമചന്ദ്രനുമാണ് പുതിയ മന്ത്രിമാരാകുക. 29 വെള്ളിയാഴ്ചയാണ് പുതിയ മന്ത്രിമാരുടെ സത്യപ്രതിജ്ഞ.
ഗതാഗത വകുപ്പാണ് ലഭിക്കുന്നതെങ്കില്‍ വകുപ്പിനെ മെച്ചപ്പെടുത്താന്‍ പ്രത്യേക പദ്ധതികള്‍ മനസിലുണ്ടെന്ന് നിയുക്ത മന്ത്രി ഗണേഷ്‌കുമാര്‍ വ്യക്തമാക്കിയിരുന്നു. സിനിമാ അഭിനയം മുഖ്യമന്ത്രി അനുവദിച്ചാല്‍ മാത്രമായിരിക്കുമെന്നും ഗണേഷ് കുമാര്‍ വ്യക്തമാക്കി. 2001 മുതല്‍ പത്താനാപുരത്തിന്റെ പ്രതിനിധിയായിരുന്ന കെ ബി ഗണേഷ്‌കുമാര്‍ 2001ല്‍ എ കെ ആന്റണി സര്‍ക്കാരില്‍ ഗതാഗത മന്ത്രിയായിരുന്നു. പിന്നീട് 22 മാസങ്ങള്‍ക്ക് ശേഷം ബാലകൃഷ്ണപിള്ളയ്ക്ക് വേണ്ടി സ്ഥാനമൊഴിഞ്ഞു. 2011ല്‍ ഉമ്മന്‍ചാണ്ടി സര്‍ക്കാരില്‍ വനം,കായികം,സിനിമ എന്നീ വകുപ്പുകളുടെ മന്ത്രിയായിരുന്നു.
