ട്രോളിങ് നിരോധനത്തിനൊപ്പം കാറ്റും മഴയും കനത്തതോടെ മത്സ്യലഭ്യതയില്‍ വന്‍ ഇടിവും. മത്സ്യലഭ്യത കുറഞ്ഞതോടെ മത്തിയും അയലയും ഉള്‍പ്പടെയുള്ള ചെറിയ മീനുകളുടെ വില കുതിച്ചുയര്‍ന്നു. കഴിഞ്ഞ ദിവസം ഒരു കിലോഗ്രാം മത്തി, അയല എന്നിവ 400 രൂപയ്ക്കാണ് വിറ്റുപോയത്. മത്തിക്ക് 350 രൂപയും അയലയ്ക്ക് 35-360 രൂപയുമായിരുന്നു മൊത്തവിപണിയിലെ വില. ട്രോളിങ് നിരോധന സമയത്ത് 3 പേര്‍ മുതല്‍ 40 പേര്‍ക്ക് പോകാവുന്ന പരമ്പരഗാത വള്ളങ്ങളില്‍ മാത്രമാണ് മീന്‍ പിടിക്കാന്‍ അനുവാദമുള്ളത്. ഇത്തവണ ജൂണ്‍ 9 മുതല്‍ കനത്ത മഴയും കാറ്റും വന്നതോടെ മത്സ്യത്തൊഴിലാളികള്‍ക്ക് കടലില്‍ പോകാന്‍ കഴിഞ്ഞിട്ടില്ല. ഇതാണ് വിലവര്‍ധനവിന് കാരണമായത്.
ദിവസങ്ങള്‍ക്ക് ശേഷം ബുധനാഴ്ചയാണ് മാനം അല്പം തെളിഞ്ഞത്. എന്നാല്‍ കാര്യമായ രീതിയില്‍ മത്സ്യം തൊഴിലാളികള്‍ക്ക് ലഭിച്ചില്ല. വരും ദിവസങ്ങളില്‍ കൂടുതല്‍ വള്ളങ്ങള്‍ കടലിലിറങ്ങുകയും തമിഴ്നാട്ടില്‍ നിന്നുള്‍പ്പടെ മീന്‍ വരവും ഉണ്ടാകുന്നതോടെ മത്സ്യവിലയില്‍ കുറവുണ്ടാകും. മത്സ്യലഭ്യത കുറയുകയും വില ഉയരുകയും ചെയ്തതോടെ പ്രതിസന്ധിയിലാണ് ചെറുകിട മത്സ്യവില്‍പ്പന കേന്ദ്രങ്ങള്‍.കഴിഞ്ഞ ദിവസങ്ങളില്‍ വള്ളങ്ങള്‍ക്ക് കടലില്‍ പോകാന്‍ കഴിയാതെ വന്നതോടെ മത്സ്യഫെഡിലും മീന്‍ വരവ് കുറഞ്ഞിരുന്നു.
