സംസ്ഥാനത്ത് തീരദേശങ്ങളില്‍ ഈ വര്‍ഷത്തെ ട്രോളിംഗ് നിരോധനം ജൂണ്‍ 9 അര്‍ദ്ധരാത്രി മുതല്‍ ജൂലൈ 31 അര്‍ദ്ധരാത്രി വരെയായി 52 ദിവസത്തേക്ക് നടപ്പാക്കുമെന്ന് മത്സ്യബന്ധന മന്ത്രി സജി ചെറിയാന്‍. മത്സ്യ വിഭവങ്ങളുടെ സംരക്ഷണത്തിനും സമുദ്രജീവികള്‍ക്കുള്ള പ്രജനനകാലം ഉറപ്പാക്കുന്നതിനുമായാണ് നടപടി.
ട്രോള്‍ നിരോധനത്തിന്റെ ഭാഗമായി, തീരദേശ ജില്ലകളിലാകെ 24 മണിക്കൂര്‍ പ്രവര്‍ത്തിക്കുന്ന കണ്‍ട്രോള്‍ റൂമുകള്‍ മേയ് 15 മുതല്‍ പ്രവര്‍ത്തനം ആരംഭിച്ചു. ഈ കണ്‍ട്രോള്‍ റൂമുകള്‍ വഴി മത്സ്യത്തൊഴിലാളികള്‍ക്കും പൊതുജനങ്ങള്‍ക്കും വേണ്ടിയുള്ള സഹായവും വിവരവിനിമയവും ഉറപ്പാക്കും.
നിരോധന കാലയളവില്‍ രക്ഷാപ്രവര്‍ത്തനങ്ങളും നിരീക്ഷണത്തിനുമായി 9 തീരദേശ ജില്ലകളിലായി 19 സ്വകാര്യ ബോട്ടുകള്‍ വാടകയ്ക്ക് എടുക്കുമെന്ന് മന്ത്രി അറിയിച്ചു. കൂടാതെ, വിഴിഞ്ഞം, വൈപ്പിന്‍, ബേപ്പൂര്‍ എന്നീ പ്രധാന മത്സ്യബന്ധന കേന്ദ്രങ്ങളെ ആസ്പദമാക്കി മൂന്ന് മറൈന്‍ ആംബുലന്‍സുകളും സജ്ജമാകും. 2024-ലെ ട്രോള്‍ നിരോധനത്തില്‍ സ്വീകരിച്ച നടപടികളേക്കാള്‍ കാര്യക്ഷമമായി ഈ വര്‍ഷം കാര്യങ്ങള്‍ നടപ്പിലാക്കുമെന്നും മന്ത്രി അറിയിച്ചു.
