നവകേരള സദസ്: തൃശൂര്‍ ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് അവധി ഇങ്ങനെ
നവകേരള സദസ് നടക്കുന്ന മണ്ഡലങ്ങളില്‍ അതതു ദിവസങ്ങളില്‍ വിദ്യാഭ്യാസ സ്ഥാപനങ്ങള്‍ക്ക് ജില്ലാ കളക്ടറാണ് അവധി പ്രഖ്യാപിച്ചത്
മുഖ്യമന്ത്രി പിണറായി വിജയന്റെ നേതൃത്വത്തിലുള്ള നവകേരള സദസ് തൃശൂര്‍ ജില്ലയിലേക്ക്. ഡിസംബര് നാല് തിങ്കളാഴ്ച മുതലാണ് നവകേരള സദസിന്റെ തൃശൂര്‍ പര്യടനം ആരംഭിക്കുക. ചേലക്കര മണ്ഡലത്തിലാണ് തൃശൂര്‍ ജില്ലയിലെ ആദ്യ നവകേരള സദസ് നടക്കുക. നവകേരള സദസിന്റെ പശ്ചാത്തലത്തില്‍ ജില്ലയിലെ വിവിധ മണ്ഡലങ്ങളിലെ സ്‌കൂളുകള്‍ക്ക് അവധി പ്രഖ്യാപിച്ചിട്ടുണ്ട്.
നവകേരള സദസ് നടക്കുന്ന മണ്ഡലങ്ങളില്‍ അതതു ദിവസങ്ങളില്‍ വിദ്യാഭ്യാസ സ്ഥാപനങ്ങള്‍ക്ക് ജില്ലാ കളക്ടറാണ് അവധി പ്രഖ്യാപിച്ചത്. ഇതുപ്രകാരം നാലാം തീയതി നവകേരള സദസ് നടക്കുന്ന ചേലക്കര, വടക്കാഞ്ചേരി, കുന്നംകുളം മണ്ഡലങ്ങളിലെ വിദ്യാഭ്യാസ സ്ഥാപനങ്ങള്‍ക്ക് അവധിയായിരിക്കും. അഞ്ചാംതീയതി മണലൂര്‍, നാട്ടിക, ഒല്ലൂര്‍, തൃശൂര്‍ എന്നിവടങ്ങളിലെയും ആറാം തീയതി കയ്പമംഗലം, കൊടുങ്ങല്ലൂര്‍, ഇരിങ്ങാലക്കുട, പുതുക്കാട് എന്നിവടങ്ങളിലെയും ഏഴാം തീയതി ചാലക്കുടി മണ്ഡലത്തിലെയും വിദ്യാഭ്യാസ സ്ഥാപനങ്ങള്‍ക്ക് അവധിയായിരിക്കും. അവധി പ്രഖ്യാപിച്ചിട്ടുള്ള ദിവസത്തിനു പകരമായി പിന്നീടു വരുന്ന മറ്റൊരു അവധി ദിവസം പ്രവൃത്തിദിനമായിരിക്കും.
നാലാം തിയതി വൈകിട്ട് ആറിനാണ് ഗുരുവായൂര്‍ മണ്ഡലത്തില്‍ നവകേരള സദസ്. അതിനാല്‍ ഈ മണ്ഡലത്തില്‍ നിലവില്‍ അവധി പ്രഖ്യാപിച്ചിട്ടില്ല. മാത്രമല്ല ഗുരുവായൂര്‍ ഏകാദശിയോട് അനുബന്ധിച്ച് മണ്ഡലത്തില്‍ നേരത്തെ പ്രാദേശിക അവധി അനുവദിച്ചിരുന്നു. അതുകൊണ്ടാണ് നവകേരള സദസുമായി ബന്ധപ്പെട്ട് അവധി ഇല്ലാത്തത്.
