'ഗുണ്ടായിസം കാണിച്ചവര്‍ക്ക് ഭൂമി നല്‍കില്ല, മറ്റാര്‍ക്കെങ്കിലും എഴുതിക്കൊടുക്കും': നെയ്യാറ്റിന്‍കര സംഭവത്തില്‍ കേസുമായി മുന്നോട്ടു പോകില്ലെന്ന പരാതിക്കാരിയുടെ തീരുമാനത്തിന് മാറ്റം

നെയ്യാറ്റിന്‍കരയില്‍ ദമ്പതികള്‍ മരിച്ച സംഭവത്തില്‍ വസ്തു കേസുമായി മുന്നോട്ടുപോകില്ലെന്ന പരാതിക്കാരിയുടെ തീരുമാനത്തിന് മാറ്റം. ദമ്പതികളുടെ മരണം വിവാദമായതിനെ തുടര്‍ന്ന് കേസുമായി മുന്നോട്ടുപോകില്ലെന്ന് പരാതിക്കാരിയായ വസന്ത രാവിലെ പറഞ്ഞിരുന്നു. 

വസ്തുവിട്ടുകൊടുക്കാന്‍ മക്കള്‍ പറയുന്നെന്നും എന്നാല്‍ നിയമത്തിന്റെ മുന്നില്‍ മുട്ടുകുത്തിച്ചിട്ട് വിട്ടുകൊടുക്കാമെന്നാണ് വസന്ത ഇപ്പോള്‍ പറയുന്നത്. സംഭവം ആത്മഹത്യ അല്ലെന്നാണ് രാജന്റെ സഹോദരി പറയുന്നത്. കൈയില്‍ നിന്ന് ലൈറ്റര്‍ തട്ടിമാറ്റാന്‍ ശ്രമിക്കുന്നതിനിടെ തീയാളിപ്പിടിക്കുകയായിരുന്നുവെന്നാണ് പൊലീസ് അറിയിച്ചത്. എന്നാല്‍ ഹൈക്കോടതിയില്‍ നിന്ന് മണിക്കൂറുകള്‍ക്കകം സ്റ്റേ ഓര്‍ഡര്‍ വരുമെന്നറിഞ്ഞ് പൊലീസും പരാതിക്കാരിയും ഒത്തുകളിച്ചുവെന്നാണ് രാജന്റെ മക്കള്‍ പറയുന്നത്.