സ്ഫോടകവസ്‌തു പൊട്ടി ആന വായ തകർന്ന് മരിച്ച സംഭവത്തിൽ ഒരാൾ പിടിയിൽ

പാലക്കാട്: അമ്പലപ്പാറ വനമേഖലയിൽ കാട്ടാന ദുരൂഹസാഹചര്യത്തിൽ ചരിഞ്ഞ സംഭവത്തിൽ ഒരാളെ പോലീസ് അറസ്റ്റ് ചെയ്‌തു.മലപ്പുറം ഓടക്കാലി സ്വദേശി വിൽസണാണ് അറസ്റ്റിലായത്.അമ്പലപ്പാറ മേഖലയിൽ കൃഷി ചെയ്യുന്നയാളാണ് ഇയാള്‍.

സൈലന്റ് വാലി ബഫർ സോണിനോട് ചേർന്നുകിടക്കുന്ന തോട്ടങ്ങളിൽ കാട്ടാനയുൾപ്പെടെയുളള വന്യ മൃഗങ്ങളുടെ ശല്യം വളരെ രൂക്ഷമാണ്. ഇവയെ അകറ്റാനായി ഭക്ഷണത്തിൽ സ്ഫോടകവസ്തുക്കൾ പൊതിഞ്ഞുവെക്കുന്ന പതിവും ഈ പ്രദേശങ്ങളിലുണ്ട്.ഇത്തരത്തിലാണ് അമ്പലപ്പാറയിലെത്തിയ ആനയ്ക്കും പരിക്കേറ്റതെന്ന നിഗമത്തിലാണ് സംയുക്ത അന്വേഷണ സംഘം.

സ്ഫോടകവസ്തുക്കൾ വെക്കാൻ സഹായിച്ചതാണ് വിൽസൺ ചെയ്‌ത കുറ്റമെന്ന് ഫോറസ്റ്റ് ഉദ്യോഗസ്ഥർ പറയുന്നു. രണ്ട് പേര്‍ കൂടി അറസ്റ്റിലാകുമെന്നും സൂചനയുണ്ട്.