ഓൺലൈൻ റമ്മികളിയിൽ പണം നഷ്ടപ്പെട്ട യുവാവ് തൂങ്ങിമരിച്ച നിലയിൽ

ഇടുക്കി : ഓൺലൈൻ റമ്മികളിയിൽ പണം നഷ്ടപ്പെട്ട യുവാവിനെ തൂങ്ങിമരിച്ച നിലയിൽ കണ്ടെത്തി. പള്ളിവാസൽ ആറ്റുകാട് വെള്ളച്ചാട്ടത്തിനടുത്തുള്ള റിസോർട്ടിലെ ജീവനക്കാരനായ കാസർകോട് വെള്ളരിക്കുണ്ട് റാണിപുരം പാറയ്ക്കൽ റജി - റെജീന ദമ്പതികളുടെ മകൻ പി.കെ.റോഷ് എന്ന 23 കാരനാണ് മരിച്ചത്.

കഴിഞ്ഞ ദിവസം രാത്രി എട്ടര മണിക്കാണ് റിസോർട്ടിനടുത്തുള്ള മരത്തിൽ തൂങ്ങിയ നിലയിൽ ഇയാളെ സഹപ്രവർത്തകർ കണ്ടെത്തിയത്. ഉടൻ തന്നെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഏറെനാളായി ഇയാൾ ഓൺലൈൻ റമ്മികളിയിൽ അടിമയായിരുന്നു എന്നാണു സഹപ്രവർത്തകർ പറയുന്നത്. ജോലി ചെയ്തു ലഭിച്ച പണം, കടം വാങ്ങിയ തുക എന്നിവ വഴിയായി ലക്ഷങ്ങളാണ് ഇയാൾക്ക് നഷ്ടമായത്.

ഏകമകനായ ഇയാൾ കുറച്ചു ദിവസങ്ങൾക്ക് മുമ്പ് തന്റെ സഹോദരിക്ക് മാരക രോഗം ഉണ്ടെന്നും അടിയന്തിര ചികിത്സയ്ക്ക് സഹായം വേണമെന്നും പറഞ്ഞതനുസരിച്ചു സഹപ്രവർത്തകർ എൺപതിനായിരം രൂപ പിരിച്ചു നൽകിയിരുന്നു. എന്നാൽ ഈ പണവും ഇയാൾ ഓൺലൈൻ റമ്മികളിയിൽ നഷ്ടപ്പെടുത്തിയതായാണ് വിവരം.