പാലക്കാട് ഉപതിരഞ്ഞെടുപ്പില്‍ കോണ്‍ഗ്രസ് മൂന്നാം സ്ഥാനത്താകുമെന്ന് സരിന്‍
അച്ചടക്ക ലംഘനത്തെ തുടര്‍ന്ന് ഇന്നലെയാണ് സരിനെ കോണ്‍ഗ്രസ് പ്രാഥമിക അംഗത്വത്തില്‍ നിന്ന് കെപിസിസി പുറത്താക്കിയത്
പാലക്കാട് ഉപതിരഞ്ഞെടുപ്പില്‍ കോണ്‍ഗ്രസ് പരാജയപ്പെടുമെന്ന് പി.സരിന്‍. സിറ്റിങ് സീറ്റായ പാലക്കാട് കോണ്‍ഗ്രസ് ഇത്തവണ മൂന്നാം സ്ഥാനത്താകും. രാഹുല്‍ മാങ്കൂട്ടത്തിലിനെ സ്ഥാനാര്‍ഥിയാക്കിയതില്‍ യുഡിഎഫില്‍ ആശങ്കയുണ്ട്. ബിജെപിക്കൊപ്പമാണ് കേരളത്തിലെ കോണ്‍ഗ്രസ് എന്നും സരിന്‍ പറഞ്ഞു.
അച്ചടക്ക ലംഘനത്തെ തുടര്‍ന്ന് ഇന്നലെയാണ് സരിനെ കോണ്‍ഗ്രസ് പ്രാഥമിക അംഗത്വത്തില്‍ നിന്ന് കെപിസിസി പുറത്താക്കിയത്. കേരളത്തിലെ കോണ്‍ഗ്രസിനു ബിജെപിയോടു മൃദു സമീപനമാണെന്ന് സരിന്‍ ആരോപിച്ചിരുന്നു. പാലക്കാട് ഉപതിരഞ്ഞെടുപ്പ് കഴിഞ്ഞാല്‍ കോണ്‍ഗ്രസിനുള്ളില്‍ കലാപമുയരുമെന്നും സരിന്‍ പറഞ്ഞു.
അതേസമയം രാഹുല്‍ മാങ്കൂട്ടത്തിലിനെ സ്ഥാനാര്‍ഥിയാക്കിയതില്‍ മുസ്ലിം ലീഗില്‍ അതൃപ്തിയുണ്ടെന്നാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍. നിഷ്പക്ഷ വോട്ടുകള്‍ പിടിക്കാന്‍ രാഹുലിന് സാധിക്കില്ലെന്ന് ലീഗ് വിലയിരുത്തുന്നു. ബിജെപി വിരുദ്ധ വോട്ടുകള്‍ ഏകീകരിക്കാന്‍ കഴിഞ്ഞ തവണ ഷാഫി പറമ്പിലിനു സാധിച്ചിരുന്നു. എന്നാല്‍ രാഹുല്‍ മാങ്കൂട്ടത്തിലിനു അത് സാധിക്കുമോ എന്ന സംശയമുണ്ടെന്ന് പാലക്കാട്ടെ ലീഗ് നേതൃത്വം ആശങ്കപ്പെടുന്നു.
