കൊവിഡ് 19: കോട്ടയത്ത് ചികിത്സയിലുള്ള രോഗിയുടെ നില ഗുരുതരമായി തുടരുന്നു

കൊവിഡ് 19 ബാധിച്ച് കോട്ടയം മെഡിക്കൽ കോളേജിൽ ചികിത്സയിൽ കഴിയുന്ന രോഗിയുടെ നില ഗുരുതരമായി തുടരുന്നു. 85 വയസ്സുള്ള സ്ത്രീയുടെ നിലയാണ് കൊവിഡ് ബാധ്ച്ചതിനെ തുടർന്ന് ഗുരുതരമായിരിക്കുന്നത്. ഇറ്റലിയില്‍ നിന്ന് എത്തിയവരുടെ മാതാപിതാക്കളും അവരുടെ മകളും മരുമകനുമാണ് കോട്ടയത്ത് ചികിത്സയിലുള്ളത്.ഇതിൽ മാതാവിന്റെ നിലയാണ് ഗുരുതരമായി തുടരുന്നത്.

ഹൃദയസംബന്ധമായ അസുഖങ്ങൾ ഇവർക്കുണ്ടായിരുന്നുവെന്നും ഇപ്പോൾ ആവശ്യമായ വൈദ്യസഹായങ്ങൾ നൽകുകയാണെന്നും ഡോക്‌ടർമാർ വ്യക്തമാക്കി. ഇവർ നാല് പേരെ കൂടാതെ പത്ത് പേരാണ് കോട്ടയം മെഡിക്കൽ കോളേജിൽ ഐസൊലേഷൻ വാർഡിൽ കഴിയുന്നത്.ഇവരുടെ പരിശോധന ഫലം ഉടന്‍ ലഭിക്കുമെന്നാണ് നിലവില്‍ ലഭിക്കുന്ന വിവരം. അതേസമയം, സംസ്ഥാനത്ത് ഇന്നലെ മാത്രം എട്ട് പേർക്ക് കൂടി കൊവിഡ് 19 സ്ഥിരീകരിച്ചതോടെ അതീവജാഗ്രതിയിലാണ് കേരളം. ഇതുവരെയുള്ള കണക്ക് പ്രകാരം ആകെ 14 പേർക്ക് കൊറോണ ബാധിച്ചതായി ആരോഗ്യമന്ത്രി ഇന്നലെ വാർത്താസമ്മേളനത്തിൽ വ്യക്തമാക്കിയിരുന്നു.