പാലാ ഉപതിരഞ്ഞെടുപ്പില്‍ യുഡിഎഫ് സ്ഥാനാര്‍ഥി ജോസ് ടോം പുലിക്കുന്നേലിന് വേണ്ടി പ്രചാരണം നടത്തുമെന്നും വിജയത്തിനായി പ്രവര്‍ത്തിക്കുമെന്നും മുതിര്‍ന്ന നേതാവ് പിജെ ജോസഫ്.
രണ്ടില ചിഹ്നം നല്‍കുന്ന കാര്യത്തില്‍ ചില സാങ്കേതിക പ്രശ്‌നങ്ങളുണ്ട്. പ്രതിപക്ഷനേതാവ് രമേശ് ചെന്നിത്തല ഇന്നലെ ഇക്കാര്യം ചൂണ്ടിക്കാട്ടിയിരുന്നതായും ജോസഫ് പറഞ്ഞു.
അതേസമയം, പാര്‍ട്ടിയില്‍ അസ്വാരസ്യങ്ങളില്ലെന്നും, വിജയിക്കാന്‍ ജോസഫിന്റെ പിന്തുണ ആവശ്യമാണെന്നും ജോസ് ടോം വ്യക്തമാക്കി. അദ്ദേഹത്തെ നേരിട്ട് പോയി കാണുകയും പിന്തുണ തേടുകയും ചെയ്യും. യുഡിഎഫിലെ മുതിര്‍ന്ന നേതാവാണ് അദ്ദേഹം. വിജയിക്കാന്‍ അദ്ദേഹത്തിന്റെ സഹായം ആവശ്യമുണ്ടെന്നും ജോസ് ടോം പറഞ്ഞു.
പാലായിലെ ജനങ്ങൾ തന്നെ ഇരുകയ്യും നീട്ടി സ്വീകരിക്കും. ആരാകണം സ്ഥാനാര്‍ഥി എന്ന ചോദ്യത്തിന് ജോസ് കെ മാണിയുടെയും നിഷയുടെയും പേരാണ് പാര്‍ട്ടിയില്‍ ഉയര്‍ന്നു വന്നത്. എന്നാല്‍, കുടുംബത്തിൽ നിന്ന് സ്ഥാനാര്‍ഥി എന്ന് തീരുമാനിച്ചത് ജോസാണ്. സ്‌റ്റിയറിംഗ് കമ്മിറ്റി ഇത് അംഗീകരിക്കുകയായിരുന്നെന്നും ജോസ് ടോം പറഞ്ഞു.
അതിനിടെ രണ്ടില ചിഹ്നത്തിന് വേണ്ടി ആരുടെ മുന്നിലും തലകുനിക്കില്ലെന്ന പ്രസ്‌താവനയില്‍ നിന്നും ജോസ് ടോം പിന്മാറി. “രണ്ടില ചിഹ്നം വേണ്ട എന്ന് പറഞ്ഞിട്ടില്ല. കെഎം മാണിയുടെ ചിഹ്നമായ രണ്ടില ആയിരിക്കണം ചിഹ്നം എന്നാണ് ആഗ്രഹിക്കുന്നത്. അതിനായി വിട്ടുവീഴ്ച ചെയ്യണമെന്ന് പറയാന്‍ എനിക്ക് അധികാരമില്ല. ചിഹ്നം എന്തായിരിക്കണമെന്ന് ജോസ് കെ മാണിയും യുഡിഎഫും തീരുമാനിക്കും. അവരുടെ തീരുമാനം എന്തായാലും താന്‍ അത് അത് അംഗീകരിക്കും” - എന്നും അദ്ദേഹം പറഞ്ഞു.