വടക്കാഞ്ചേരി കൂട്ടബലാത്സംഗം: ജയന്തന്റെ പാർട്ടി അംഗത്വം സസ്പെൻഡ് ചെയ്യുമെന്ന് സിപിഎം

വടക്കാഞ്ചേരി നഗരസഭാ കൗൺസിലര്‍ പി എൻ ജയന്തനെതിരെ കടുത്ത നടപടിക്കൊരുങ്ങി സിപിഎം

വടക്കാഞ്ചേരി നഗരസഭാ കൗൺസിലര്‍ പി എൻ ജയന്തനെതിരെ കടുത്ത നടപടിക്കൊരുങ്ങി സിപിഎം. രണ്ടുവർഷം മുമ്പ് തന്നെ കൂട്ടമാനഭംഗത്തിന് ഇരയാക്കിയെന്ന വീട്ടമ്മയുടെ വെളിപ്പെടുത്തലിനെ തുടർന്നാണ് ജയന്തന്റെ പാര്‍ട്ടി അംഗത്വം സസ്പെൻഡ് ചെയ്യാന്‍ സിപി‌എം തീരുമാനിച്ചത്. ഇക്കാര്യം സംബന്ധിച്ച നിർദേശം തൃശൂർ ജില്ലാ കമ്മിറ്റി ഏരിയ കമ്മിറ്റിക്കു നൽകുകയും ചെയ്തു.    

ജയന്തൻ ഉൾപ്പെടെ നാലു പേരാണ് തന്നെ കൂട്ടമാനഭംഗത്തിനിരയാക്കിയതെന്ന് യുവതി കഴിഞ്ഞ ദിവസം തിരുവനന്തപുരത്ത് നടത്തിയ വാർത്താസമ്മേളനത്തില്‍ വെളിപ്പെടുത്തിയിരുന്നു. തുടര്‍ന്ന് ജയന്തനെതിരായ ആരോപണം പാര്‍ട്ടി ഗൌരവമായി അന്വേഷിക്കുമെന്ന് സിപിഎം വ്യക്തമാക്കിയിരുന്നു. കൂട്ടമാനഭംഗത്തെപ്പറ്റി ഭാഗ്യലക്ഷ്മി ഫേസ്‌ബുക്കിലെഴുതിയ കുറിപ്പാണ് ഈ സംഭവം വീണ്ടും ചർച്ചയാക്കിയത്.