ശൈശവ വിവാഹം, ഗാർഹിക പീഡനം: മല്ലു ട്രാവലർക്കെതിരെ പോക്സോ കേസ്

യൂട്യൂബ് വ്‌ളോഗര്‍ മല്ലു ട്രാവലര്‍ എന്ന ഷാക്കിര്‍ സുബ്ഹാനെതിരെ പോലീസ് പോക്‌സോ നിയമപ്രകാരം കേസെടുത്തു. മുന്‍ ഭാര്യ നല്‍കിയ പരാതിയില്‍ ശൈശവ വിവാഹം, ഗാര്‍ഹിക പീഡനം എന്നിവയാണ് ആരോപിച്ചിട്ടുള്ളത്. കണ്ണൂര്‍ ധര്‍മടം പോലീസാണ് കേസ് രജിസ്റ്റര്‍ ചെയ്തത്.

ഒന്നരമാസം മുന്‍പ് ഒരു സൗദി വനിത തന്നെ പീഡിപ്പിക്കാന്‍ ശ്രമിച്ചെന്ന് ആരോപിച്ച് ഷാക്കിര്‍ സുബ്ഹാനെതിരെ പരാതി നല്‍കുകയും ഇതില്‍ പോലീസ് കേസെടുക്കുകയും ചെയ്തിരുന്നു. കൊച്ചിയിലെ ഹോട്ടലില്‍ വെച്ച് ഷാക്കിര്‍ കടന്നുപിടിക്കാന്‍ ശ്രമിക്കുകയും പീഡിപ്പിക്കാന്‍ ശ്രമം നടത്തുകയും ചെയ്‌തെന്നായിരുന്നു പരാതി. ഇതിന് പിന്നാലെയാണ് ഷാക്കിറിനെതിരെ മുന്‍ ഭാര്യയും പരാതിയുമായി രംഗത്ത് വന്നത്.

പ്രായപൂര്‍ത്തിയാകും മുന്‍പ് തന്നെ വിവാഹം കഴിച്ചെന്നും 15 വയസ്സില്‍ ഗര്‍ഭിണി ആയിരിക്കുമ്പോള്‍ പോലും തന്നെ അതിക്രൂരമായി പീഡിപ്പിച്ചെന്നും ഗര്‍ഭച്ചിദ്രം നടത്തിയെന്നും അടക്കം ഗുരുതരമായ ആരോപണങ്ങളാണ് ആദ്യ ഭാര്യ ഷാക്കിറിനെതിരെ ഉന്നയിച്ചിരിക്കുന്നത്. കേസ് ഇരിട്ടി പോലീസ് സ്‌റ്റേഷന്‍ പരിധിയില്‍ വരുന്നതിനാല്‍ അവിടേക്ക് കൈമാറുമെന്ന് ധര്‍മ്മടം പോലീസ് അറിയിച്ചു. അതിന് ശേഷം കൂടുതല്‍ വകുപ്പുകള്‍ ചുമത്തണമോ എന്ന കാര്യത്തില്‍ ഇരിട്ടി പോലീസാകും തീരുമാനമെടുക്കുക.