പ്രണയദിനം കരിദിനമാക്കിയ സദാചാര ഗുണ്ടകളെ അറസ്റ്റ് ചെയ്തു; നടപടി മുഖ്യമന്ത്രിയുടെ ഇടപെടലിനെ തുടർന്ന്
മുഖ്യമന്ത്രി വടിയെടുത്തു, സദാചാര ഗുണ്ടകളെ 4 ദിവസം കൊണ്ട് പിടിച്ചു
കൊല്ലത്ത് പ്രണയദിനത്തിന്റെ അന്ന് സദാചാര പൊലീസ് ചമഞ്ഞ് യുവതീ‌യുവാക്കളെ ആക്രമിച്ച സംഭവത്തിൽ മൂന്ന് പേരെ പൊലീസ് അറസ്റ്റ് ചെയ്തു. രണ്ട് പേർക്കുള്ള തിരച്ചിൽ പൊലീസ് ഊർജ്ജിതമാക്കിയിട്ടുണ്ട്. സംഭവം ശ്രദ്ധയിൽ പെട്ടതോടെ മുഖ്യമന്ത്രി പിണറായി വിജയൻ സദാചാര ഗുണ്ടകൾക്കെതിരെ കർശന നടപടികൾ സ്വീകരിക്കുമെന്ന് വ്യക്തമാക്കിയിരുന്നു.
ആക്രമിക്കപ്പെട്ട യുവതീ- യുവാക്കളുടെ പരാതിയിൽമേൽ ആണ് പൊലീസ് പ്രതികളെ അറസ്റ്റ് ചെയ്തത്. അഞ്ചംഗ സംഘം ദൃശ്യങ്ങള്‍ പകര്‍ത്തി സമൂഹമാധ്യമങ്ങളില്‍ പ്രചരിപ്പിച്ചെന്നും ദേഹോപദ്രവം ചെയ്‌തെന്നും പരാതിയില്‍ വ്യക്തമാക്കിയിരുന്നു. പ്രാഥമിക കൃത്യത്തിന് പോയപ്പോള്‍ പിടികൂടി മര്‍ദ്ദിക്കുകയായിരുന്നുവെന്ന് ആക്രമണത്തിനിരയായ യുവതി പരാതിയില്‍ പറയുന്നു.
ഇവരെ ശാരീരികമായും മാനസികമായും പീഢിപ്പിക്കുകയും ആ ദൃശ്യങ്ങള്‍ മൊബൈലില്‍ പകര്‍ത്തി ഇന്‍റര്‍നെറ്റ് വഴി പ്രചരിപ്പിക്കുകയും ചെയ്തതിനെതിരെ നടപടികൾ സ്വീകരിക്കണമെന്ന് ഇന്നലെ മുഖ്യമന്ത്രി പൊലീസിന് നിർദേശം നൽകിയിരുന്നു. സംസ്ഥാനത്ത് അടുത്തിടെ ഉണ്ടായ സദാചാര ഗുണ്ടാവിളയാട്ടങ്ങള്‍ ശ്രദ്ധയില്‍പ്പെട്ടതിനെ തുടര്‍ന്നാണ് നടപടി.
