തിരുവനന്തപുരം: തദ്ദേശ തെരഞ്ഞെടുപ്പിലെ പരാജയത്തിന് പിന്നാലെ കോൺഗ്രസിൽ ഉൾപ്പോര്. സീറ്റ് വിൽക്കാൻ കൂട്ടുനിന്ന നേതാക്കളെ പാർട്ടിയിൽ നിന്നും പുറത്താക്കണം എന്ന് ആവശ്യപ്പെടുന്ന പോസ്റ്ററുകൾ കെപിസിസി ആസ്ഥാനത്തിന് മുന്നിൽ പ്രത്യക്ഷപ്പെട്ടു. തിരുവനന്തപുരം കോർപ്പറേഷനിൽ ദയനീയ പരാജയത്തെ കുറിച്ചാണ് പോസ്റ്റർ. മുൻ മന്ത്രി വിഎസ് ശിവകുമാർ, നെയ്യാറ്റിൻകര സനൽ, തമ്പാനൂർ രവി, ശരത്ചന്ദ്ര പ്രസാദ് എന്നീ നേതാക്കളെ പുറത്താക്കണം എന്നാണ് പോസ്റ്ററിൽ ആവശ്യപ്പെട്ടിരിയ്കുന്നത്
തിരുവനന്തപുരം ഡിസിസി പിരിച്ചുവിടണം എന്നും പോസ്റ്ററിൽ ആവശ്യം ഉന്നയിച്ചിട്ടുണ്ട്. കോൺഗ്രസ് രാഷ്ട്രീയകാര്യ സമിതി ഇന്ന് യോഗം ചേരാനിരിയ്ക്കെയാണ് കോൺഗ്രസിലെ കലാപം വ്യക്തമാക്കുന്ന പോസ്റ്ററുകൾ പ്രത്യക്ഷപ്പെട്ടിരിയ്ക്കുന്നത്. തിരുവനന്തപുരം കോർപ്പറേഷനിൽ 10 സീറ്റുകൾ നേടാൻ മാത്രമാണ് കോൺഗ്രസിനായത്. 12 വാർഡുകളിൽ 500 വോട്ടുകളിൽ താഴെ മാത്രമാണ് കോൺഗ്രസ്സിന് ലഭിച്ചത്. നെടൂങ്കാട് 74, വലിയതുറയിൽ 42 മാത്രമാണ് കോൺഗ്രസ്സിന് ലഭിച്ച വോട്ട്.
