P.V.Anvar: കോണ്‍ഗ്രസിനു മുന്നില്‍ അടിയറവു പറഞ്ഞ് അന്‍വര്‍; ആര്യാടന്‍ ഷൗക്കത്തിനായി വോട്ട് ചോദിക്കും

അന്‍വര്‍ സംസ്ഥാന കണ്‍വീനറായ തൃണമൂല്‍ കോണ്‍ഗ്രസിനെ യുഡിഎഫിലെ അസോഷ്യേറ്റ് പാര്‍ട്ടിയായി അംഗീകരിക്കും

P.V.Anvar: കോണ്‍ഗ്രസിന്റെ കടുംപിടിത്തത്തിനു മുന്നില്‍ വഴങ്ങി പി.വി.അന്‍വര്‍. നിലമ്പൂര്‍ ഉപതിരഞ്ഞെടുപ്പില്‍ യുഡിഎഫുമായി സഹകരിക്കാന്‍ തീരുമാനിച്ചു. നിലപാട് പ്രഖ്യാപനം ഉടനുണ്ടാകും. യുഡിഎഫ് കൂടി കൈവിട്ടാല്‍ തന്റെ രാഷ്ട്രീയഭാവി തുലാസിലാകുമെന്ന് വ്യക്തമായതോടെയാണ് അന്‍വറിന്റെ 'യു-ടേണ്‍'. 

അന്‍വര്‍ സംസ്ഥാന കണ്‍വീനറായ തൃണമൂല്‍ കോണ്‍ഗ്രസിനെ യുഡിഎഫിലെ അസോഷ്യേറ്റ് പാര്‍ട്ടിയായി അംഗീകരിക്കും. നാളെ നടക്കുന്ന തൃണമൂല്‍ കോണ്‍ഗ്രസ് സംസ്ഥാന സെക്രട്ടേറിയറ്റ് യോഗത്തിനു ശേഷമായിരിക്കും തുടര്‍ നടപടികള്‍. നിലമ്പൂരിലെ കോണ്‍ഗ്രസ് സ്ഥാനാര്‍ഥി ആര്യാടന്‍ ഷൗക്കത്തിനായി അന്‍വര്‍ പ്രചാരണത്തിനിറങ്ങും. 

നിലമ്പൂര്‍ ഉപതിരഞ്ഞെടുപ്പില്‍ യുഡിഎഫിനു ഐക്യദാര്‍ഢ്യം പ്രഖ്യാപിച്ചാല്‍ ഭാവിയില്‍ തനിക്കു മാന്യമായ പരിഗണന മുന്നണിയില്‍ നിന്ന് ലഭിക്കണമെന്നാണ് അന്‍വറിന്റെ ആവശ്യം. 2026 ലെ നിയമസഭാ തിരഞ്ഞെടുപ്പ് വരുമ്പോള്‍ ഇക്കാര്യം പരിഗണിക്കാമെന്ന് കോണ്‍ഗ്രസ് അന്‍വറിനു ഉറപ്പ് നല്‍കി. ഉപതിരഞ്ഞെടുപ്പില്‍ ആര്യാടന്‍ ഷൗക്കത്ത് ജയിച്ചാല്‍ നിലമ്പൂര്‍ മണ്ഡലം പിന്നെ തനിക്കു ലഭിക്കില്ലെന്ന് അറിയാവുന്ന അന്‍വര്‍ അടുത്ത നിയമസഭാ തിരഞ്ഞെടുപ്പില്‍ ജയസാധ്യതയുള്ള ഒരു മണ്ഡലം വേണമെന്ന് കോണ്‍ഗ്രസിനോടു ആവശ്യപ്പെട്ടിട്ടുണ്ട്. എന്നാല്‍ ഇക്കാര്യത്തില്‍ കോണ്‍ഗ്രസ് ഇതുവരെ ഉറപ്പ് നല്‍കിയിട്ടില്ല. 

വി.എസ്.ജോയിയെ നിലമ്പൂരില്‍ സ്ഥാനാര്‍ഥിയാക്കണമെന്ന് അന്‍വര്‍ കോണ്‍ഗ്രസ് നേതൃത്വത്തോടു ആവശ്യപ്പെട്ടിരുന്നു. ആര്യാടന്‍ ഷൗക്കത്തിനെ സ്ഥാനാര്‍ഥിയാക്കിയാല്‍ പിന്തുണയ്ക്കില്ലെന്നായിരുന്നു അന്‍വറിന്റെ നിലപാട്. എന്നാല്‍ അന്‍വറിനെ പൂര്‍ണമായി തള്ളിയായിരുന്നു നിലമ്പൂരില്‍ കോണ്‍ഗ്രസ് സ്ഥാനാര്‍ഥിയെ പ്രഖ്യാപിച്ചത്. പിണറായി വിജയനെതിരായ പോരാട്ടത്തില്‍ യുഡിഎഫിനൊപ്പം നില്‍ക്കാമെന്ന് താന്‍ നിലപാടെടുത്തിട്ടും തന്റെ ആവശ്യങ്ങള്‍ക്കു യാതൊരു വിലയും കോണ്‍ഗ്രസ് നല്‍കിയില്ലെന്ന വിഷമം അന്‍വറിനു ഇപ്പോഴും ഉണ്ട്.