'ദയവായി മത്സരിക്കരുത്'; അന്‍വറിനോടു കെഞ്ചി രാഹുല്‍ മാങ്കൂട്ടത്തില്‍, സന്ദര്‍ശനം രാത്രി സ്വകാര്യമായി

കോണ്‍ഗ്രസ് നേതൃത്വത്തിന്റെ അറിവോടെയാണ് മാങ്കൂട്ടത്തില്‍ അന്‍വറുമായി കൂടിക്കാഴ്ച നടത്തിയതെന്നാണ് റിപ്പോര്‍ട്ട്

Rahul Mamkootathil

പി.വി.അന്‍വറുമായി രാഹുല്‍ മാങ്കൂട്ടത്തില്‍ എംഎല്‍എ കൂടിക്കാഴ്ച നടത്തി. ഇന്നലെ രാത്രിയാണ് അന്‍വറിന്റെ വീട്ടില്‍ അപ്രതീക്ഷിത അതിഥിയായി രാഹുല്‍ എത്തിയത്. വളരെ സ്വകാര്യമായി നടത്തിയ സന്ദര്‍ശനത്തിന്റെ ദൃശ്യങ്ങള്‍ പി.വി.അന്‍വറിന്റെ അനുയായികള്‍ ആണ് പുറത്തുവിട്ടത്. 

കോണ്‍ഗ്രസ് നേതൃത്വത്തിന്റെ അറിവോടെയാണ് മാങ്കൂട്ടത്തില്‍ അന്‍വറുമായി കൂടിക്കാഴ്ച നടത്തിയതെന്നാണ് റിപ്പോര്‍ട്ട്. എന്നാല്‍ കോണ്‍ഗ്രസ് നേതൃത്വം ഇക്കാര്യം സമ്മതിക്കുന്നില്ല. സമവായ ചര്‍ച്ചകള്‍ക്കായി ആരെയും നിയോഗിച്ചിട്ടില്ലെന്നും രാഹുല്‍ മാങ്കൂട്ടത്തില്‍ അന്‍വറിനെ കണ്ടത് വ്യക്തിപരമായ ബന്ധത്തിലാകുമെന്നും കോണ്‍ഗ്രസ് നേതൃത്വം പറയുന്നു. 

അതേസമയം നിലമ്പൂര്‍ ഉപതിരഞ്ഞെടുപ്പില്‍ മത്സരിക്കരുതെന്ന് രാഹുല്‍ അന്‍വറിനോടു ആവശ്യപ്പെട്ടു. കോണ്‍ഗ്രസില്‍ നിന്ന് എന്തെങ്കിലും ബുദ്ധിമുട്ടുകള്‍ ഉണ്ടായിട്ടുണ്ടെങ്കില്‍ ചര്‍ച്ച ചെയ്തു പരിഹരിക്കാമെന്നും പിണറായി വിജയനെതിരായ പോരാട്ടത്തില്‍ ഒറ്റക്കെട്ടായി നില്‍ക്കണമെന്നും രാഹുല്‍ മാങ്കൂട്ടത്തില്‍ അന്‍വറിനോടു ആവശ്യപ്പെട്ടതായാണ് റിപ്പോര്‍ട്ട്. 

View this post on Instagram

A post shared by P͟r͟a͟v͟e͟e͟n͟ B͟a͟l͟a͟n͟ N͟a͟r͟a͟y͟a͟n͟a͟n͟ (@comrade.pbn)

കൂടിക്കാഴ്ചയ്ക്ക് ശേഷം പുറത്തിറങ്ങിയപ്പോള്‍ 'ഓള്‍ ദ് ബെസ്റ്റ്' എന്ന് അന്‍വറും 'ഗുഡ്‌നൈറ്റ്' എന്ന് രാഹുലും പറയുന്നത് വിഡിയോയില്‍ കാണാം. യുഡിഎഫുമായി ധാരണയിലെത്തിയില്ലെങ്കില്‍ നിലമ്പൂരില്‍ മത്സരിക്കാന്‍ പി.വി.അന്‍വര്‍ തയാറെടുക്കുകയാണ്. തൃണമൂല്‍ കോണ്‍ഗ്രസിന്റെ പിന്തുണയോടെ അന്‍വര്‍ മത്സരിക്കുമെന്നാണ് ഇപ്പോള്‍ ലഭിക്കുന്ന വിവരം.