കോഴിക്കോട്: സാമൂതിരിയുടെ നാട്ടിൽ ശാന്തിഗിരിയുടെ വിസ്മയസൗധം -വിശ്വജ്ഞാനമന്ദിരം- സമർപ്പണത്തിന് കേളികൊട്ടുയരുന്നു. ഏപ്രിൽ രണ്ടിന് വൈകുന്നേരം ആറു മണി മുതൽ കോഴിക്കോട് കടലോരത്തെ ഫ്രീഡം സ്ക്വയറിൽ ഗായകർ സംഗീതസന്ധ്യ ഒരുക്കിയാണ് വിശ്വജ്ഞാനമന്ദിരം സമർപ്പണത്തിന് കേളികൊട്ടുയർത്തുന്നത്.
മലയാളത്തിലെ നിത്യഹരിത ഗാനങ്ങൾ ഗായകർ ആലപിക്കുമ്പോൾ ആസ്വാദകരായി സംഗീതത്തെ നെഞ്ചെറ്റുന്ന കോഴിക്കോട്ടുകാരുണ്ടാകും.പഴയതലമുറയിലേയും പുതു തലമുറയിലേയും ഗായകർ റംസാനിലെ രാവിനെ സംഗീത സാന്ദ്രമാക്കുന്ന മതസൗഹാർദ്ദ ഗാനങ്ങൾ ആലപിക്കും.
ചടങ്ങിൽ കോഴിക്കോട്ടെ വിവിധ മേഖലകളിൽ പ്രമുഖരായ സർഗപ്രതിഭകളെ ആദരിക്കും. കവിയും ഗാനരചയിതാവുമായ പി.കെ. ഗോപി, ചലച്ചിത്രപ്രവർത്തകരായ ജോയ് മാത്യു, കോഴിക്കോട് നാരായണൻ നായർ, ഹരീഷ് കണാരൻ, മുസ്തഫ, അപ്പുണ്ണിശശി, വിജിലേഷ്, നവാസ് വള്ളികുന്ന്, വിജിത്ത് ബാല, നാടകപ്രവർത്തകൻ ശിവദാസ് പൊയിൽകാവ്, ഗായകരായ ഷാഫി കൊല്ലം, അമൃതവർഷിണി, ഋതുരാജ് തുടങ്ങിയവർ ആദരവ് ഏറ്റുവാങ്ങും.
