സംസ്ഥാനത്ത് പുതിയ പൊലീസ് മേധാവിയെ നിയമിക്കുന്നതിനുള്ള പട്ടികയില്‍ നിന്ന് ടോമിന്‍ ജെ.തച്ചങ്കരിയുടെ പേര് ഒഴിവാക്കി. മൂന്ന് പേരുടെ അന്തിമ പട്ടികയായി. ഇതില്‍ ടോമിന്‍ ജെ.തച്ചങ്കരി ഇല്ലെന്നാണ് റിപ്പോര്‍ട്ട്. വ്യാഴാഴ്ച ഡല്‍ഹിയില്‍ യു.പി.എസ്.സി. സമിതിയില്‍ നടന്ന യോഗത്തിലാണ് അന്തിമ പട്ടിക തയ്യാറായത്. ഡി.ജി.പി.യെ തിരഞ്ഞെടുക്കുന്നതിനായി 30 വര്‍ഷം സേവന കാലാവധി പൂര്‍ത്തിയാക്കിയ ഒന്‍പത് ഉദ്യോഗസ്ഥരുടെ പട്ടികയായിരുന്നു സംസ്ഥാന സര്‍ക്കാര്‍ യു.പി.എസ്.സിക്ക് കൈമാറിയത്. നിലവില്‍ മനുഷ്യാവകാശ കമ്മിഷന്‍ അന്വേഷണവിഭാഗം ഡിജിപിയായ ടോമിന്‍ ജെ.തച്ചങ്കരിക്കെതിരെയുള്ള വിജിലന്‍സ് കേസ് സംബന്ധിച്ച് യു.പി.എസ്.സി.ക്ക് നേരത്തെ പരാതി പോയിരുന്നു. അന്തിമ പട്ടികയില്‍ നിന്ന് തച്ചങ്കരി പുറത്താകാന്‍ ഇതാണ് കാരണമെന്നാണ് സൂചന.
1987 ബാച്ച് ഐപിഎസ് ഉദ്യോഗസ്ഥനാണ് തച്ചങ്കരി. ഫയര്‍ഫോഴ്സ് ഡയറക്ടര്‍, കെഎസ്ആര്‍ടിസി മാനേജിങ് ഡയറക്ടര്‍, പൊലീസ് ഹെഡ് ക്വാട്ടേഴ്സ് എഡിജിപി, ട്രാന്‍സ്പോര്‍ട്ട് കമ്മിഷണര്‍, സിവില്‍ സപ്ലൈസ് എംഡി, കേരള ബുക്സ് ആന്‍ഡ് പബ്ലിക്കേഷന്‍സ് സൊസൈറ്റി ചെയര്‍മാന്‍ തുടങ്ങിയ പദവികള്‍ തച്ചങ്കരി വഹിച്ചിട്ടുണ്ട്. ആലപ്പുഴയില്‍ എഎസ്പിയായിട്ടാണ് തുടക്കം. കോഴിക്കോട്, എറണാകുളം, പാലക്കാട്, കണ്ണൂര്‍ എന്നിവിടങ്ങളില്‍ പൊലീസ് മേധാവിയായിട്ടുണ്ട്.