ഞാന്‍ പൂർണ ആരോഗ്യവാനാണ്, ആരോഗ്യത്തിന് യാതൊരു പ്രശ്നവുമില്ല- വിഎസ്
തന്റെ ശരീരത്തിനോ അവയവങ്ങള്‍ക്കോ ഒരു പ്രശ്നവും സംഭവിച്ചിട്ടില്ല
പൂർണ ആരോഗ്യവാനാണ് താനെന്ന് വിഎസ് അച്യുതാനന്ദൻ. തന്റെ ആരോഗ്യത്തിന് യാതൊരു പ്രശ്നവുമില്ല. പാറശാല മുതൽ കണ്ണൂർവരെ പ്രചാരണം നടത്തിയത് എല്ലാവരും കണ്ടതാണ്. തെരഞ്ഞെടുപ്പുകാലത്തെ ആരോഗ്യം ഇപ്പോഴുമുണ്ട്. അതിൽനിന്ന് എന്തെങ്കിലും മാറ്റം തനിക്ക് ഇപ്പോഴുണ്ടോയെന്നും വിഎസ് ചോദിച്ചു.
തന്റെ ശരീരത്തിനോ അവയവങ്ങള്‍ക്കോ ഒരു പ്രശ്നവും സംഭവിച്ചിട്ടില്ല. അന്നത്തെ സാഹചര്യങ്ങളില്‍നിന്നു തന്റെ ആരോഗ്യത്തിന് എന്തെങ്കിലും മാറ്റമുണ്ടായോ എന്ന് പറയാന്‍ കഴിയുമോ എന്ന് വിഎസ് ചോദിച്ചു. ഔദ്യോഗിക വസതിയില്‍ വിദ്യാര്‍ഥികളുമായി സംവദിക്കവേ ആയിരുന്നു വിഎസ് തന്റെ ആരോഗ്യത്തെക്കുറിച്ച് പരാമര്‍ശം നടത്തിയത്.
കൊക്കിൽ ശ്വാസമുളളിടത്തോളം പോരാട്ടം തുടരുമെന്ന് വിഎസ് അച്യുതാനന്ദൻ ഇന്ന് ഫേസ്‌ബുക്കിലൂടെ വ്യക്തമാക്കിയിരുന്നു. ഒരു കമ്മ്യൂണിസ്റ്റുകാരൻ എന്ന നിലയിൽ ഈ തെരഞ്ഞെടുപ്പിൽ ചരിത്രപരമായ ചില ഉത്തരവാദിത്വങ്ങൾ നിർവഹിക്കേണ്ടതുണ്ടായിരുന്നു. അതുകൊണ്ടാണ് പാർട്ടി കേന്ദ്ര നേതൃത്വത്തിന്റെ നിർദേശം അംഗീകരിച്ച് മത്സരിക്കാൻ തയ്യാറായതെന്നും അദ്ദേഹം ഫേസ്‌ബുക്ക് പോസ്‌റ്റിലൂടെ വ്യക്തമാക്കി. കേരളത്തിൽ ഇടതു മുന്നണി ജയത്തിനായി പ്രവർത്തിച്ച എല്ലാവർക്കും വിഎസ് വീണ്ടും ഒരിക്കൽ കൂടി നന്ദി അറിയിച്ചു.
