ജയിലില്‍ അനുവാദമില്ലാതെ ഫോണ്‍ ഉപയോഗിച്ചതിന് പള്‍സര്‍ സുനിക്കെതിരെ കേസ്

പള്‍സര്‍ സുനിയെ ഒരിക്കല്‍ കൂടി പൊലീസ് കസ്റ്റഡിയിലെടുക്കും

കൊച്ചിയില്‍ പ്രമുഖനടിയെ ആക്രമിച്ച സംഭവത്തില്‍ കാക്കനാട് ജയിലില്‍ കഴിയുന്ന മുഖ്യ പ്രതി പള്‍സര്‍ സുനിയെന്ന സുനില്‍ കുമാറിനെതിരെ മറ്റൊരു കേസു കൂടി. അനുവാദമില്ലാതെ ജയിലില്‍ വെച്ച് ഫോണ്‍‌വിളിച്ചുവെന്ന കുറ്റത്തിനാണ് പുതിയ കേസ്. 

നടി ആക്രമിക്കപ്പെട്ടതുമായി ബന്ധപ്പെട്ട് നടന്‍ ദിലീപിനേയും സംവിധായകന്‍ നാദിര്‍ഷായേയും വിളിച്ച് ഭീഷണിപ്പെടുത്തിയത് സുനിയാണെന്ന് പൊലീസിന് വ്യക്തമായിരുന്നു. ഇതിനെ തുടര്‍ന്നാണ് സുനിക്കെതിരെ പൊലീസ് കേസെടുത്തത്. 

ഫോണ്‍ വിളിയുമായി ബന്ധപ്പെട്ട് പള്‍സര്‍ സുനി ഉള്‍പ്പെടെ 7 പേര്‍ക്കെതിരെയാണ് പൊലീസ് കേസെടുത്തിരിക്കുന്നത്. സുനിയുടെ സഹതടവുകാരായ മഹേഷ്, സനല്‍ , വിപിന്‍ ലാല്‍ , വിഷ്ണു എന്നിവര്‍ക്കെതിരെയാണ് കേസെടുത്തിരിക്കുന്നത്. 

അതേസമയം, നടി ആക്രമിക്കപ്പെട്ട സംഭവവുമായി ബന്ധപ്പെട്ട് പള്‍സര്‍ സുനിയെ ഒരിക്കല്‍ കൂടി കസ്റ്റഡിയില്‍ വാങ്ങാന്‍ പൊലീസ് തീരുമാനിച്ചു. ജയി‌ലില്‍ വെച്ച് പള്‍സര്‍ സുനി നടത്തിയ ഫോണ്‍ വിളികളെ കുറിച്ച് പൊലീസിന് വിവരങ്ങള്‍ ലഭിച്ചു കഴിഞ്ഞു.