കൊച്ചിയില്‍ നടി ആക്രമിക്കപ്പെട്ടതുമായി ബന്ധപ്പെട്ട കേസന്വേഷണം ഇപ്പോള്‍ വഴിത്തിരവിലെത്തി നില്‍ക്കുകയാണ്. സംഭവത്തില്‍ നടന്‍ ദിലീപിന് പങ്കുണ്ടെന്ന തരത്തിലുള്ള വാര്‍ത്തകള്‍ മുമ്പുതന്നെ പുറത്തുവന്നിരുന്നു. എന്നാല്‍ ഇപ്പോള്‍ അതു ഉറപ്പിക്കുന്ന തരത്തിലുള്ള വാര്‍ത്തകളാണ് കഴിഞ്ഞ ദിവസങ്ങളില്‍ പുറത്തുവന്നുകൊണ്ടിരിക്കുന്നത്.
എന്നാല്‍ ഈ വാര്‍ത്തകള്‍ക്ക് പ്രതികരണവുമായി ദിലീപും സുഹൃത്തായ നാദിര്‍ഷയും രംഗത്തു വന്നിരുന്നു. നടി ആക്രമിക്കപ്പെട്ട സംഭവത്തില്‍ ദിലീപിന്റെ പേര് പുറത്തു പറയുന്നതിനു താരത്തെ കുടുക്കുന്നതിനുമായി മലയാള സിനിമയിലെ ചിലര്‍ തന്നെയാണ് ശ്രമിക്കുന്നതെന്ന തരത്തിലുള്ള വാര്‍ത്തയാണ് ഇപ്പോള്‍ സോഷ്യല്‍ മീഡിയയിലൂടെ പ്രചരിച്ചു കൊണ്ടിരിക്കുന്നത്.
ക്യാമറയുടെ പിന്നില്‍ നിന്നും മുന്നിലേക്കെത്തി താരമായി ഉയര്‍ന്ന നടനാണ് ദിലീപ്. നടനെന്ന രീതിയില്‍ മികച്ച സ്വീകാര്യതയാണ് താരത്തിന് ലഭിച്ചിരുന്നത്. എക്കാലത്തും കുട്ടികളുടേയും കുടുംബ പ്രേക്ഷകരുടേയും പ്രിയതാരമാണ് ദിലീപ്. മലയാള സിനിമയിലെ മുന്‍നിര താരങ്ങള്‍ക്കൊപ്പം തന്നെ സ്ഥാനം നേടിയ താരത്തിന്റെ വളര്‍ച്ചയില്‍ അസൂയപൂണ്ട പലരും പല തരത്തിലുള്ള ആരോപണവുമായി മുമ്പും രംഗത്തെത്തിയിരുന്നു
നടി ആക്രമിക്കപ്പെട്ട സംഭവത്തില്‍ ദിലീപിന്റെ പേരു പുറത്തു പറയുന്നതിനായി മലയാള സിനിമയിലെ ചിലര്‍ ശ്രമിച്ചിരുന്നുവെന്ന് അറസ്റ്റിലായ പ്രതിയുടെ സഹതടവുകാരനാണ് വെളിപ്പെടുത്തിയത്. നടി ആക്രമിക്കപ്പെട്ട കേസുമായി ബന്ധപ്പെട്ട് അറസ്റ്റിലായ പള്‍സര്‍ സുനിയുടെ സഹതടവുകാരന്റെ വെളിപ്പെടുത്തല്‍ എന്ന രീതിയിലാണ് ഇത്തരത്തിലുള്ള വാര്‍ത്ത സോഷ്യല്‍ മീഡിയയിലൂടെ പ്രചരിച്ചു കൊണ്ടിരിക്കുന്നത്.
അതേസമയം, മലയാളത്തിലെ പ്രശസ്തനായ ഒരു യുവതാരവും ഈ സംഭവത്തിനു പിന്നിലുണ്ടെന്നതരത്തിലുള്ള വാര്‍ത്തകളും സമൂഹമാധ്യമങ്ങളില്‍ പ്രചരിക്കുന്നുണ്ട്. ഈ യുവതാരവുമായി ദിലീപ് അത്ര സ്വരച്ചേര്‍ച്ചയിലല്ല ഉള്ളതെന്നും റിപ്പോര്‍ട്ടില്‍ പറയുന്നു. എന്നാല്‍ ഈ ഗൂഡാലോചന നടത്തുന്നതിനായി താരങ്ങള്‍ ശ്രമിച്ചുവെന്നതിന് ഒരു തെളിവും ഇതുവരെയും ലഭിച്ചിട്ടില്ലെന്നതാണ് മറ്റൊരു കാര്യം.
