കോടതി മുറിയില്‍ വെച്ച് ഭര്‍ത്താവിന്റെ കഴുത്തില്‍ പിടിച്ച് യുവതി; ഞെട്ടി ജഡ്ജി !
വേറിട്ട് കഴിയുന്ന യുവതിയും ഭര്‍ത്താവും കേസുമായി ബന്ധപ്പെട്ട് കോടതിയില്‍ എത്തിയിരുന്നു
കോഴിക്കോട് ജെ.എഫ്.സി.എം മൂന്നാം കോടതിയില്‍ നാടകീയ രംഗങ്ങള്‍. കുടുംബ തര്‍ക്കവുമായി ബന്ധപ്പെട്ട കേസ് നടക്കുന്നതിനിടെ യുവതി ഭര്‍ത്താവിന്റെ കഴുത്തില്‍ പിടിച്ചു. ജഡ്ജി നോക്കി നില്‍ക്കെയാണ് സംഭവം. വെള്ളിയാഴ്ച ഉച്ചയോടെയാണ് നാടകീയ രംഗങ്ങള്‍ അരങ്ങേറിയത്.
വേറിട്ട് കഴിയുന്ന യുവതിയും ഭര്‍ത്താവും കേസുമായി ബന്ധപ്പെട്ട് കോടതിയില്‍ എത്തിയിരുന്നു. കേസ് നടക്കുന്നതിനിടെ ഭര്‍ത്താവിനൊപ്പം കഴിയുന്ന കുട്ടികളെ കാണണമെന്ന് ആവശ്യപ്പെട്ട് യുവതി ബഹളം വയ്ക്കുകയായിരുന്നു. മജിസ്‌ട്രേറ്റ് ഇടപെട്ട് ബഹളം ഉണ്ടാക്കരുതെന്ന് താക്കീത് ചെയ്‌തെങ്കിലും ഇവര്‍ പ്രശ്‌നമുണ്ടാക്കുകയായിരുന്നു. ബഹളത്തിനിടയില്‍ യുവതി ഭര്‍ത്താവിന്റെ കഴുത്തിന് പിടിച്ചു. കോടതി മുറിയില്‍ ഡ്യൂട്ടിയില്‍ ഉണ്ടായിരുന്ന പൊലീസ് ഉദ്യോഗസ്ഥരാണ് പിന്നീട് ഇവരെ പിടിച്ചുമാറ്റിയത്.
സംഭവത്തെ തുടര്‍ന്ന് മജിസ്‌ട്രേറ്റിന്റെ നിര്‍ദേശപ്രകാരം യുവതിക്കെതിരെ പൊലീസ് കേസെടുത്തു. കൃത്യനിര്‍വഹണം തടസപ്പെടുത്തല്‍, അന്യായമായി തടഞ്ഞുവയ്ക്കല്‍, ഭീഷണിപ്പെടുത്തല്‍ തുടങ്ങിയ വകുപ്പുകള്‍ പ്രകാരമാണ് യുവതിക്കെതിരെ കേസ് രജിസ്റ്റര്‍ ചെയ്തിരിക്കുന്നത്.
