മുകേഷിന്റെ നിലപാടുകള്‍ അദ്ദേഹത്തെ തിരിഞ്ഞുകൊത്തുമോ ? താരത്തോട് വിശദീകരണം നല്‍കാന്‍ സിപിഎം നേതൃത്വം
മുകേഷിന്റെ നിലപാടിനെതിരെ സിപിഎം
കൊല്ലം എംഎൽഎയും നടനുമായ മുകേഷിനെതിരെ സിപിഎം കൊല്ലം ജില്ലാ കമ്മിറ്റി രംഗത്ത്. ചലച്ചിത്ര താരങ്ങളുടെ സംഘടനയായ ‘അമ്മ’യുടെ യോഗത്തിൽ മുകേഷ് എടുത്ത നിലപാടുകള്‍ ജില്ലാ കമ്മിറ്റിയിൽ ഉന്നയിക്കാനും സംഭവങ്ങളിൽ മുകേഷിൽനിന്നു വിശദീകരണം തേടാനുമാണ് നേതൃത്വത്തിന്റെ തീരുമാനമെന്നാണ് പുറത്തുവരുന്ന വിവരം.
അമ്മയുടെ ജനറൽ ബോഡി യോഗത്തിനു ശേഷം നടന്ന വാർത്താ സമ്മേളനത്തിൽ നടിയെ ആക്രമിച്ചതുമായി ബന്ധപ്പെട്ട മാധ്യമ പ്രവർത്തകരുടെ ചോദ്യങ്ങളാണ് അഭിനേതാക്കളും എംഎൽഎ മാരുമായ മുകേഷിനെയും കെ ബി ഗണേഷ്കുമാറിനെയും ചൊടിപ്പിച്ചത്. ദിലീപിനെ ഒറ്റപ്പെടുത്താനുള്ള ശ്രമങ്ങൾ അനുവദിക്കില്ലെന്നും വനിതാ സംഘടനയുടെ പ്രതിനിധികൾ യോഗത്തിനെത്തി അമ്മയ്ക്കു പിന്തുണ അറിയിച്ചതായും മുകേഷ് പറഞ്ഞു.
വനിതാ സംഘടനയുടെ ഭാരവാഹിക്കൾക്കുപോലുമില്ലാത്ത പ്രശ്നം മാധ്യമങ്ങൾക്കെന്തിനാണെന്നും അദ്ദേഹം ചോദിച്ചു. നടി ആക്രമിക്കപ്പെട്ട സംഭവുമായി ബന്ധപ്പെട്ട് യോഗത്തിൽ ആരും ഒന്നും പറഞ്ഞില്ലെന്നായിരുന്നു ഗണേഷ് പ്രതികരിച്ചത്. ദിലീപിനെയും നടിയെയും തള്ളിപ്പറഞ്ഞിട്ടില്ലെന്നും എന്തു വിലകൊടുത്തും അമ്മ അതിലെ അംഗങ്ങളെ രക്ഷിക്കുമെന്നും ഇന്നസന്റ് പറഞ്ഞു. നടൻ ദേവനും ചോദ്യങ്ങളിൽ ഇടപെട്ടു സംസാരിച്ചിരുന്നു.
