യുവതി തൂങ്ങിമരിച്ച നിലയിൽ; പിഞ്ചുകുഞ്ഞിനെ സുഹൃത്തിനെ ഏൽപ്പിച്ച് പിതാവ് മുങ്ങി

കുഞ്ഞിനെ സുഹൃത്തിനെ ഏൽപ്പിച്ച് പിതാവ് മുങ്ങി; ഭക്ഷണം കഴിച്ചിട്ട് വരാമെന്ന് പറഞ്ഞ അച്ഛൻ തിരിച്ചെത്തിയില്ല

ഒ‌ൻപതു മാസം പ്രായമുള്ള കുഞ്ഞിനെ സുഹൃത്തിന്റെ വീട്ടിൽ ഏൽപ്പിച്ച് അച്ഛൻ മുങ്ങി. കുഞ്ഞിന്റെ അമ്മയെ വീടിനുള്ളിൽ തൂങ്ങി മരിച്ച നിലയിലും കണ്ടെത്തി. സംഭവം കൊലപാതകമാണോ എന്ന അന്വേഷണ‌ത്തിലാണ് പൊലീസ്.

ഞായറാഴ്ചരാത്രി 10-ഓടെ കല്‍പ്പകഞ്ചേരിയില്‍ താമസിക്കുന്ന സഹീറലിയാണ് തന്റെ കുഞ്ഞിനെ സുഹൃത്തായ ഷൈഖ് അമീര്‍ ഹുസൈനെ ഏല്‍പ്പിച്ചത്. എടവണ്ണ പത്തപ്പിരിയത്താണ് സുഹൃത്തിന്റെ വീട്. ക്ഷണംകഴിച്ച് 15 മിനിറ്റിനകം തിരിച്ചുവരാമെന്നാണ് പറഞ്ഞാണ് സഹീറലി പോയതെന്നും പക്ഷേ തിരിച്ചു വന്നില്ലെന്നും അമീർ ഹുസൈൻ പൊലീസിന് മൊഴി നൽകി.  

തിങ്കളാഴ്ച രാവിലെ 10 മണിയോടെ കുഞ്ഞിനെ എടവണ്ണ സ്റ്റേഷനില്‍ എത്തിച്ചു. ഇതിനിടെയാണ് കല്പകഞ്ചേരിയില്‍ താമസസ്ഥലത്ത് യുവതി തൂങ്ങിമരിച്ച വിവരം ലഭിക്കുന്നത്. സഹീറലിയുടെ ഭാര്യ റാജിയ കാത്തുവിനെയാണ് (21) മരിച്ചനിലയില്‍ കണ്ടെത്തിയത്. ഇവരുടെ ഒന്‍പതുമാസം പ്രായമുള്ള കുഞ്ഞിനെ കാണാതായ വിവരവും ലഭിച്ചു. 

എടവണ്ണ പോലീസ് സ്റ്റേഷനില്‍ നിന്നും ചൈല്‍ഡ് ലൈനിന് കൈമാറിയ കുഞ്ഞിനെ മലപ്പുറം ശിശുപരിപാലന കേന്ദ്രത്തിലേക്ക് മാറ്റി.