ടെക്‌നോപാർക്ക് ഐടി കമ്പനിയിലെ സോഫ്റ്റ് വെയർ എഞ്ചിനീയറായ യുവതിയെ വിവാഹ വാഗ്ദാനം നൽകി പീഡിപ്പിച്ച കേസിൽ അതെ കമ്പനിയിലെ ടെക്കിയായ യുവാവിനെ പോലീസ് അറസ്റ് ചെയ്തു. തെലുങ്കാന ഖമ്മം ജില്ലയിൽ പാൽവഞ്ച സ്വദേശി രാജ്‌മോഹൻ സിംഗ് താക്കൂറാണ് (28) പോലീസ് പിടിയിലായത്.
ആന്ധ്രാ പ്രദേശ് വിജയവാഡ സ്വദേശിനിയാണ് പീഡനത്തിനിരയായത്. ടെക്‌നോപാർക്കിലെ യു.എസ.ടി ഗ്ലോബൽ കമ്പനിയിൽ ജോലി ചെയ്യുന്ന യുവതിയെ പ്രണയം നടിച്ച് പാട്ടിലാക്കുകയും പ്രതിയുടെ ഫ്‌ളാറ്റിൽ താമസിപ്പിച്ച് പീഡിപ്പിക്കുകയും ചെയ്തു. ഗർഭിണിയായ യുവതിയെ ഒരു സ്വകാര്യ ആശുപത്രിയിൽ പ്രവേശിപ്പിച്ച് ഗർഭം അലസിപ്പിക്കുകയും ചെയ്തു.
എന്നാൽ പിന്നീട് ഇയാൾ മറ്റൊരു യുവതിയെ വിവാഹം കഴിക്കാനുള്ള തയ്യാറെടുപ്പ് നടത്തി. ഇതറിഞ്ഞ യുവതി പോലീസിൽ പരാതി നൽകുകയായിരുന്നു. തെലുങ്കാനയിൽ നിന്നാണ് കഴക്കൂട്ടം സൈബർ സിറ്റി പോലീസ് പ്രതിയെ പിടികൂടിയത്.
