മുഖ്യമന്ത്രിക്ക് നടന്‍ ദിലീപിന്റെ അമ്മയുടെ കത്ത്. തന്റെ മകന്‍ നിരപരാധിയാണ്. നടി ആക്രമിക്കപ്പെട്ട കേസില്‍ അവനെ കുടുക്കാനായി മനപൂര്‍വം ശ്രമം നടന്നു. ഇപ്പോള്‍ പൊലീസ് നടത്തുന്ന അന്വേഷണം ശരിയായ ദിശയിലാണെന്ന് ഉറപ്പുവരുത്തണമെന്നും രണ്ടുദിവസം മുമ്പ് അയച്ച കത്തില്‍ ദിലീപിന്റെ അമ്മ ആവശ്യപ്പെട്ടു. കത്ത് ഡിജിപിക്ക് മുഖ്യമന്ത്രി കൈമാറി.
ഇക്കഴിഞ്ഞ ആഴ്ച ദിലീപിനെ കാണാന്‍ അമ്മ സരോജം ആലുവ സബ് ജയിലില്‍ എത്തിയിരുന്നു. ദിലീപിന്റെ സഹോദരന്‍ അനൂപിനൊപ്പമാണ് അവര്‍ ജയിലെത്തിയത്. ഇതിനുശേഷമാണ് മുഖ്യമന്ത്രിക്ക് ദിലീപിന്റെ അമ്മ കത്തയച്ചതെന്നാണ് സൂചന. നിലവില്‍ ആലുവ സബ്ജയിലില്‍ റിമാന്‍ഡില്‍ കഴിയുന്ന ദിലീപ് ജാമ്യത്തിനായി വീണ്ടും ഹൈക്കോടതിയെ സമീപിച്ചിരിക്കുകയാണ്.
