മോദിയുടെ മണ്ഡലമായ വാരണാസിയിൽ എതിരാളി പ്രിയങ്ക ഗാന്ധി?
അവരെ അവരുടെ കോട്ടയിൽ ചെന്ന് വെല്ലുവിളിച്ച് തോൽ‌പ്പിക്കണം? - മോദിയുടെ മണ്ഡലമായ വാരണാസിയിൽ മത്സരിക്കാനൊരുങ്ങി പ്രിയങ്ക ഗാന്ധി
പാർട്ടി ആവശ്യപ്പെടുകയാണെങ്കിൽ ലോൿസഭ തെരഞ്ഞെടുപ്പിൽ മത്സരിക്കാൻ തയ്യാറാണെന്ന് എഐസിസി ജനറല്‍ സെക്രട്ടറി പ്രിയങ്ക ഗാന്ധി കഴിഞ്ഞ ദിവസമ അറിയിച്ചിരുന്നു. ഇപ്പോഴിതാ, പ്രവർത്തകരെ ആവേശത്തിലാഴ്ത്തുന്ന പ്രഖ്യാപനമാണ് പ്രിയങ്ക ഗാന്ധി നടത്തിയിരിക്കുന്നത്. മത്സരിക്കുകയാണെങ്കിൽ പ്രധാനമന്ത്രി നരേന്ദ്രമോദിയുടെ മണ്ഡലമായ വാരണാസിയിൽ മത്സരിച്ചാലെന്താണെന്ന് പ്രിയങ്ക ചോദിക്കുന്നു.
അമ്മ സോണിയാ ഗാന്ധിയുടെ മണ്ഡലമായ റായ്ബറേലിയിലെ പ്രചാരണത്തിനിടെയാണ് വാരണാസിയിൽ മത്സരിച്ചാൽ കൊള്ളാമെന്നുള്ള ആഗ്രഹം പ്രിയങ്ക അറിയിച്ചത്. പ്രചാരണത്തിനിടെ റായ്ബറേലിയില്‍ മത്സരിക്കണമെന്ന് കോണ്‍ഗ്രസ് പ്രവര്‍ത്തകര്‍ പ്രിയങ്കയോട് അഭ്യര്‍ഥിച്ചിരുന്നു. അപ്പോള്‍ എന്തുകൊണ്ട് വാരാണസിയില്‍ മത്സരിച്ചുകൂട എന്നാണ് പ്രിയങ്ക ഇവർക്ക് മറുപടി നൽകിയത്.
യുപിയുടെ ചുമതലയുള്ള എഐസിസി ജനറല്‍ സെക്രട്ടറിയായ പ്രിയങ്ക ഇതാദ്യമായിട്ടാണ് മത്സരിക്കുന്നതിന് സന്നദ്ധത അറിയിച്ചിരിക്കുന്നത്. പ്രിയങ്ക യുപിയില്‍ നിന്നോ മറ്റ് സംസ്ഥാനങ്ങളിലോ നിന്ന് ജനവിധി തേടുമോയെന്ന ചോദ്യവും ഇതിനകം കോണ്‍ഗ്രസില്‍ ശക്തമായിട്ടുണ്ട്.
