ഇംഗ്ളീഷിലെ ആദ്യത്തെ അച്ചടിച്ച പുസ്തകം - സേയിംഗ്സ് ഓഫ് ഫിലോസഫേഴ്സ്-പുറത്തിറങ്ങിയത് 1477 നവംബര്‍ 18 നായിരുന്നു.531 കൊല്ലം മുമ്പ്. വില്യം കാക്സ്റ്റണ് (1422-1491) ആയിരുന്നു പുസ്തകം അച്ചടിച്ചത്.
ഇംഗ്ളീഷിലെ ആദ്യത്തെ പ്രിന്‍റര്‍ എന്ന ബഹുമതി കാക്സ്റ്റണ് സ്വന്തം. 1450 ഓടെ ഗുട്ടന്‍ബര്‍ഗ് അച്ചടിയന്ത്രം കണ്ടുപിടിച്ചു. അതു കഴിഞ്ഞ് കാല്‍നൂറ്റാണ്ടിനകം കാക്സ്റ്റണ് ഇംഗ്ളീഷില്‍ പുസ്തകം അച്ചടിച്ചു തുടങ്ങിയിരുന്നു.
ഫ്രഞ്ചില്‍ നിന്നു ഇംഗ്ളീഷിലേക്ക് വിവര്‍ത്തനം ചെയ്ത റീക്യൂ യെല്‍ ഓഫ് ഹിസ്റ്ററീസ് ഓഫ് ട്രോയെ എന്ന പുസ്തകമാണ് ആദ്യം അദ്ദേഹം അച്ചടിച്ചത്.
ഇംഗ്ളണ്ടില്‍ കെന്‍റിലെ വീല്‍ഡിലായിരുന്നു കാക്സ്റ്റണ് ജനിച്ചത്. 1438 ല്‍ തുണിക്കച്ചവടം പരിചയിക്കാനായി അദ്ദേഹം ലണ്ടനിലെത്തി. പിന്നീട് ലണ്ടനിലെ മേയറായി മാറിയ റോബര്‍ട്ട് ലാര്‍ജ്ജ് എന്ന വന്‍ തുണിവ്യാപാരിയുടെ കീഴിലായിരുന്നു പരിശീലനം.
ലാര്‍ജ്ജ് മരിച്ചശേശം കാക്സ്റ്റണ് 1441 ല്‍ ബെല്‍ജിയത്തിലെ ബര്‍ഗസിലെത്തി. അവിടെ ഇംഗ്ളീഷ് രാജ-ാവിന്‍റെ സഹോദരിയും ബര്‍ഗാന്‍റി പ്രഭ്വിയുമായിരുന്ന മാര്‍ഗരറ്റിന്‍റെ കുടുംബവുമായി അദ്ദേഹം അടുത്ത ബന്ധം സ്ഥാപിച്ചു. ഇത് ധാരാളം യാത്രചെയ്യാനും പുതിയ അച്ചടിവിദ്യയുമായി പരിചയപ്പെടാനും കാക്സ്റ്റണ് അവസരം നല്‍കി.
ഒട്ടും അമാന്തിച്ചില്ല. കാക്സ്റ്റണ് ബര്‍ഗസില്‍ ഒരച്ചടിശാല സ്ഥാപിച്ചു. 1475 ല്‍ ഇംഗ്ളീഷില്‍ പുസ്തകം അച്ചടിക്കുകയും ചെയ്തു. ഫ്രഞ്ചില്‍ നിന്നും സ്വയം വിവര്‍ത്തനം ചെയ്ത റീക്യൂ യെല്‍ ഓഫ് ഹിസ്റ്ററീസ് ഓഫ് ട്രോയെ.
ഇതാണ് ഇംഗ്ളീഷ് ലിപിയില്‍ ആദ്യം അച്ചടിച്ച പുസ്തകം. എന്നാല്‍ ഇംഗ്ളീഷിലെഴുതി ഇംഗ്ളീഷില്‍ അച്ചടിച്ച (ഇംഗ്ളണ്ടില്‍ അച്ചടിച്ച) ആദ്യത്തെ പുസ്തകമാണ് സേയിംഗ്സ് ഓഫ് ദ ഫിലോസഫേഴ്സ്.
1476 ല്‍ അദ്ദേഹം അച്ചടിയുടെ സാങ്കേതിക വിദ്യ ഇംഗ്ളണ്ടിലെത്തിച്ചു. വെസ്റ്റ് മിനിസ്റ്ററില്‍ ഇംഗ്ളണ്ടിലെ ആദ്യത്തെ അച്ചടിശാല സ്ഥാപിക്കുകയും ചെയ്തു. 1477 ല്‍ ഇവിടെയാണ് സേയിംഗ്സ് ഓഫ് ദ ഫിലോസഫേഴ്സ് അച്ചടിക്കുന്നത്. ഇംഗ്ളീഷ് രാജാവിന്‍റെ അളിയന്‍ റിവേഴ്സ് പ്രഭു ആണ് ഈ കൃതി രചിച്ചത്.
കാക്സ്റ്റണ് അച്ചടിച്ച ഏറ്റവും പ്രധാനപ്പെട്ട കൃതി പക്ഷെ, ഇംഗ്ളീഷ് കവി ജെഫ്രി ചോസറിന്‍റെ കാന്‍റര്‍ബറി ടെയ്ല്‍സാണ്.
അക്കാലത്തുതന്നെ കാക്സ്റ്റണ് നൂറിലേറെ പുസ്തകങ്ങള്‍ അച്ചടിച്ചിരുന്നു. ചോസറിന്‍റെ തന്നെ ട്രോയ്ലെസ്സ് ക്രിസൈഡെ, അമ്റ്റൊരു ഇംഗ്ളീഷ് കവിയായ ജോണ്‍ ഗ്രോവറിന്‍റെ കണ്‍ഫെസിയോ അമാന്‍ഡിസ് എന്നിവ ആദ്യകാലത്ത് അച്ചടിച്ചവയില്‍ പെടുന്നു.
ഇക്കൂട്ടത്തില്‍ നാല്‍പതില്‍ താഴെ പുസ്തകങ്ങള്‍ 500 കൊല്ലത്തിനുശേഷം ഇപ്പോഴും കേടുകൂടാതെയിരിപ്പുണ്ട്.
