ലഹരിയില്ലാതെ ലഹരിയുണ്ടാക്കാനാവുമോ? ചോദ്യം സാഹിത്യ - സിനിമാ രംഗത്തുള്ളവരോടാണെങ്കില്‍ പല അഭിപ്രായങ്ങള്‍ ഉയര്‍ന്നുവരും. ചിലര്‍ പറയും, അല്‍പ്പം ലഹരി ഒരു രസമാണെന്ന്. ചിലര്‍ക്ക് ലഹരി കൂടിയേ തീരൂ. എന്നാല്‍ കൂടുതല്‍ പേരും പറയും, ലഹരി ഉപയോഗിക്കാതെ സൃഷ്ടികള്‍ നടത്താനാകും എന്ന്.
സൃഷ്ടി തന്നെ ലഹരി ആയവര്‍ക്ക് മറ്റ് ലഹരികള്‍ ആവശ്യമില്ല. മലയാള സിനിമയിലെ ചില പ്രമുഖ സംവിധായകര്‍ തങ്ങളുടെ സൃഷ്ടികള്‍ക്ക് ഒരു ലഹരിയുടെയും പിന്‍‌ബലം ആവശ്യമില്ലെന്ന അഭിപ്രായക്കാരാണ്. സത്യന്‍ അന്തിക്കാട്, സിദ്ദിക്ക്, കമല്‍ തുടങ്ങിയവര്‍ മദ്യപിക്കുകയോ പുകവലിക്കുകയോ ചെയ്യുന്നവരല്ല. അവരാണ് മലയാള സിനിമയ്ക്ക് അഭിമാനിക്കാവുന്ന, മലയാളികള്‍ക്ക് നെഞ്ചോട് ചേര്‍ത്തുവയ്ക്കാവുന്ന ഒട്ടേറെ മികച്ച സിനിമകള്‍ സമ്മാനിച്ചത്.
യഥാര്‍ത്ഥത്തില്‍ ലഹരിയുടെ ഉപയോഗം മനുഷ്യന്‍റെ സൃഷ്ടിപരമായ കഴിവുകളെ തളര്‍ത്തുകയാണ് ചെയ്യുന്നത്. ഉപയോഗിക്കുമ്പോള്‍ കുറച്ചൊക്കെ ആവേശം തോന്നുമെങ്കിലും അതിന് ശേഷം വലിയ ക്ഷീണാവസ്ഥയിലേക്ക് ശരീരത്തെയും മനസിനെയും തള്ളിയിടുകയാണ് എല്ലാ ലഹരി പദാര്‍ത്ഥങ്ങളും ചെയ്യുക.
ഒരു എഴുത്തുകാരനോ സംവിധായകനോ ഏറ്റവും ആവശ്യം വേണ്ടത് ഒരിക്കലും തളരാത്ത ഊര്‍ജ്ജമാണ്. എപ്പോഴും ഉണര്‍ന്നിരിക്കുന്ന ചിന്തയാണ്. എപ്പോഴും പ്രവര്‍ത്തിക്കുന്ന ഭാവനയാണ്. ഒരു സിഗരറ്റ് പുകയോ ഒരു തുള്ളി മദ്യമോ ഈ ഊര്‍ജ്ജത്തിന് തടസം സൃഷ്ടിക്കുക തന്നെയാണ് ചെയ്യുക. അതുകൊണ്ടുതന്നെ, മറ്റുള്ളവരെ ആനന്ദം നല്‍കാനായി സൃഷ്ടിനടത്തുന്ന പ്രതിഭകള്‍ യാതൊരുവിധ ലഹരിപദാര്‍ത്ഥങ്ങള്‍ക്കും അടിപ്പെടാതെ സന്യാസ തുല്യമായ ജീവിതം നയിച്ചാല്‍ അവര്‍ക്ക് എത്തിപ്പിടിക്കാവുന്ന ഉയരങ്ങള്‍ വളരെ വലുതാണ്.
